जापानमा विदेशी जनसङ्ख्या बढ्नुमा नेपालीको पनि योगदान

जापानमा विदेशी बासिन्दाको सङ्ख्या बढ्नुमा नेपालीको पनि ठूलो योगदान रहेको पछिल्लो जनगणनाले देखाएको छ। मङ्गलबार सार्वजनिक सन् २०२५ को अन्तिम जनगणना नतिजाअनुसार जापानमा विदेशी बासिन्दा झन्डै ३८ लाख ४० हजार पुगेका छन्। यो सङ्ख्या सन् २०२० को तुलनामा करिब १० लाख ९३ हजार अर्थात् करिब ४० प्रतिशतले बढी हो।

यो वृद्धिमा भियतनामी र नेपाली बासिन्दाको सङ्ख्या बढ्नुको पनि भूमिका रहेको तथ्याङ्कले देखाएको छ। विदेशीसमेत गरी जापानको कुल जनसङ्ख्या भने सन् २०२५ अक्टोबर १ मा करिब १२ करोड ३० लाख थियो। यो सन् २०२० भन्दा करिब ३१ लाख ७० हजार अर्थात् करिब २.५ प्रतिशत कम हो।

जनगणनामा कुल जनसङ्ख्या घटेको यो लगातार तेस्रो पटक हो। ६५ वर्षमाथिका मानिसको हिस्सा करिब २९.४ प्रतिशत पुगेर अहिलेसम्मकै उच्च भएको छ। यस उमेर समूहमा करिब ३ करोड ६२ लाखभन्दा बढी मानिस छन्।

यो हिस्सा सन् २०२० को तुलनामा करिब ०.९ प्रतिशत विन्दुले बढेको हो।