राजधानीका डाँडामा काँस फुल्न थाले, शरद ऋतुको आगमन

काठमाडौँ उपत्यकाका डाँडा, खुला मैदान र नदी किनारमा काँसका सेता फूल फुल्न थालेका छन्। घाँस प्रजातिको काँस सामान्यतया वर्षा सकिएर शरद ऋतु सुरु हुने बेला फुल्ने भएकाले यसलाई ऋतु फेरिएको प्राकृतिक सङ्केत मानिन्छ। केही दिनयता फुलेका काँस हेर्न र तस्बिर खिच्न डाँडाकाँडा पुग्नेको सङ्ख्या बढेको छ।

कतिपय ठाउँमा सडक र बस्ती नजिकका खाली जग्गामा पनि काँस फुलेका छन्। नेपाली समाजमा काँसलाई दसैँ–तिहारजस्ता चाडपर्वको आगमनसँग जोडेर हेरिन्छ र यो बेला गाउँदेखि सहरसम्म यसले छुट्टै रौनक थप्छ। काँस फुल्न थाले पनि मनसुनको प्रभाव भने पूरै हटिसकेको छैन।

जल तथा मौसम विज्ञान विभागका अनुसार अहिले देशमा मनसुनसँगै पश्चिमी वायुको पनि आंशिक असर छ भने मनसुनको न्यून चापीय रेखा सामान्य स्थानभन्दा दक्षिणतिर रहेको छ। विभागले आज काठमाडौँमा मेघगर्जनसहित मध्यम वर्षाको ४० प्रतिशत सम्भावना रहेको र तापक्रम २७ डिग्री सेल्सियस रहने जनाएको छ। कोशी, बागमती र गण्डकी प्रदेशका पहाडी र हिमाली भागका एक-दुई ठाउँमा भारी वर्षा हुन सक्ने विभागको पूर्वानुमान छ।