४० मेगावाटको राहुघाट जलविद्युत् आयोजना राष्ट्रिय प्रसारण प्रणालीमा जोडियो

नेपाल विद्युत् प्राधिकरणअन्तर्गतको रघुगङ्गा हाइड्रोपावर लिमिटेडले म्याग्दीको रघुगङ्गा गाउँपालिकामा बनाएको ४० मेगावाटको राहुघाट जलविद्युत् आयोजना बुधबारदेखि राष्ट्रिय प्रसारण प्रणालीमा जोडिएको छ। आयोजनाका २०-२० मेगावाटका दुई युनिटबाट निस्केको बिजुली कालीगण्डकी करिडोर २२० केभी प्रसारण लाइन हुँदै प्रणालीमा पुगेको छ। प्राधिकरणसँगको विद्युत् खरिद-बिक्री सम्झौताअनुसार अब परीक्षण उत्पादन घोषणा हुनेछ र १५ दिनको परीक्षण सफल भएपछि व्यावसायिक उत्पादन सुरु हुनेछ।

प्राधिकरणका कार्यकारी निर्देशक तथा कम्पनीको सञ्चालक समिति अध्यक्ष दीर्घायुकुमार श्रेष्ठले विकट भूगोल, कोभिड महामारी र बाढीजस्ता अवरोध पार गर्दै आयोजना सम्पन्न गरिएको बताउनुभएको छ। उहाँका अनुसार बिजुलीको माग उच्च हुने साँझको समयमा आयोजनालाई दैनिक चार घण्टा पूर्ण क्षमतामा चलाउन सकिन्छ।