प्रहरी समायोजन नहुँदा संघीयता कार्यान्वयनमा अप्ठ्यारो: बागमती मुख्यमन्त्री

बागमती प्रदेशका मुख्यमन्त्री किरण थापा मगरले प्रहरी समायोजन टुंगो नलाग्दा संघीय शासन व्यवस्था लागु गर्न कठिन भएको बताउनुभएको छ। ७१औँ प्रहरी दिवसको अवसरमा बागमती प्रदेश प्रहरी कार्यालयको आयोजनामा शुक्रबार हेटौँडामा भएको समारोहमा उहाँले यस्तो धारणा राख्नुभएको हो। संविधानले प्रदेशलाई दिएको अधिकार र जिम्मेवारी कार्यान्वयन गर्न समायोजन आवश्यक रहेको उहाँको भनाइ छ।

प्रक्रिया पूरा नहुँदा शान्ति सुरक्षा र प्रहरी प्रशासन व्यवस्थापनमा प्रदेश सरकारलाई व्यावहारिक कठिनाइ भइरहेको उहाँले बताउनुभएको छ। उहाँले समायोजन छिटो टुंग्याउन संघीय सरकारसहित तीनै तहका सरकारलाई आग्रह गर्नुभएको छ। प्रहरी परिचालन, जनशक्ति व्यवस्थापन र सेवा प्रवाहमा प्रदेशले प्रभावकारी भूमिका खेल्न पाउने वातावरण चाहिने उहाँको धारणा छ।

मुख्यमन्त्री थापा मगरले नागरिकले प्रहरीलाई आफ्नो संरक्षकका रूपमा महसुस गर्ने वातावरण बनाउन निर्देशन दिनुभएको छ। प्रहरी र नागरिकबीचको सम्बन्ध विश्वास, सहकार्य र आपसी सम्मानमा टिकेको हुनुपर्ने उहाँले बताउनुभएको छ। प्रहरी सेवा निष्पक्ष, पारदर्शी, संवेदनशील र नागरिकमैत्री हुनुपर्नेमा उहाँले जोड दिनुभएको छ।

नेपाल प्रहरीलाई व्यावसायिक, जनउत्तरदायी, अनुशासित र प्रविधिमैत्री संगठन बनाउन प्रदेश सरकार प्रतिबद्ध रहेको उहाँको भनाइ छ। शान्ति सुरक्षा, विपद् न्यूनीकरण, उद्धार र राहतका लागि प्रहरीलाई स्रोतसाधन, प्रविधि र तालिम उपलब्ध गराउनुपर्ने उहाँले बताउनुभएको छ।