‘बसन्ती’ र ‘बखत्ते’ चलचित्रको शुभमुहूर्त, खेम सेन्चुरी अभिनयमा

गायक तथा सङ्गीतकार खेम सेन्चुरी नारायण रायमाझीको नयाँ चलचित्र ‘बसन्ती’मार्फत पहिलोपटक अभिनयमा देखिने हुनुभएको छ। ललितपुरको कार्यविनायक मन्दिरमा शुक्रबार शुभमुहूर्त गर्दै निर्माण पक्षले चलचित्र औपचारिक रूपमा घोषणा गरेको छ। चलचित्रमा खेमसँग मोडल टेरिया फौजा मगरको जोडी रहनेछ।

निर्देशकका रूपमा रायमाझीको यो चौथो चलचित्र हो, यसअघि उहाँले ‘गोर्खापल्टन’, ‘परदेशी’ र ‘परदेशी २’ निर्देशन गर्नुभएको थियो। रिमा फिल्म्सको प्रस्तुतिमा बन्ने चलचित्रको कथा गीतकार रमेश बिजीले लेख्नुभएको हो र छायाङ्कन शनिबारदेखि काठमाडौँमा सुरु हुनेछ। पाल्पा, जनकपुर, बुटवल र भारतका विभिन्न ठाउँमा पनि दृश्य खिचिने निर्माण पक्षले जनाएको छ।

यही नामको चलचित्र नीर शाहले २०५७ सालमा निर्देशन गर्नुभएको थियो, त्यसको २६ वर्षपछि रायमाझीले सोही नाममा नयाँ चलचित्र बनाउन लाग्नुभएको हो। उता, ‘जारी’ र ‘जारी २’ का निर्देशक उपेन्द्र सुब्बाको नयाँ चलचित्र ‘बखत्ते’को पनि शुक्रबार ललितपुरकै महालक्ष्मी मन्दिर परिसरमा शुभमुहूर्त भएको छ। सुब्बा आफैँले लेख्नुभएको कथामा विपिन कार्की र मिरुना मगर मुख्य भूमिकामा देखिनुहुनेछ।

आन्भी फिल्म्सको प्रस्तुति र कबड्डी फिल्म्सको सहकार्यमा बन्ने चलचित्रका निर्माता आशिष तामाङ र प्रदीपजी धामी हुनुहुन्छ। लामो तयारीपछि इमानदारीपूर्वक कथा लेखेको र सोही भावले चलचित्र बनाउने निर्देशक सुब्बाले बताउनुभएको छ। काठमाडौँमा एप्पल इन्टरटेनमेन्ट र बाहिर कुबेर सिने डिस्ट्रिब्युसन्सले यसको वितरण गर्नेछन्।