बाढीपछि त्रिशूलीमा फेरि र्‍याफ्टिङ सुरु

भोटेकोसी नदीमा भदौ १० गते आएको बाढीपछि रोकिएको त्रिशूली नदीको र्‍याफ्टिङ फेरि नियमित रूपमा सुरु भएको छ। बाढीले नदीको बहाव र पानीको सतहमा उतारचढाव ल्याएपछि सुरक्षाका दृष्टिले जलयात्रा केही समय बन्द गरिएको थियो। नेपाल एसोसिएसन अफ र्‍याफ्टिङ एजेन्सिज, नाराले विज्ञ, अनुभवी गाइड र प्राविधिकको टोली खटाएर मुख्य रुटको स्थलगत निरीक्षण गरेपछि सेवा खोल्ने निर्णय गरेको हो।

टोलीले नदीको बहाव, धार र रुटमा आएका परिवर्तन केलाएको थियो। केही ठाउँमा पानीको तीव्र बहाव र छालसहितका नयाँ र्‍यापिड बनेका छन् भने केही पुराना धार बदलिएका छन्। तैपनि अहिलेको बहाव र्‍याफ्टिङका लागि अनुकूल र सुरक्षित रहेको विज्ञहरूले बताएका छन्।

नदीको अवस्था सामान्य भएपछि जलपर्यटन व्यवसायीहरूले सेवा फेरि सञ्चालनमा ल्याएका हुन्। पटक–पटक अध्ययन र निरीक्षण गरेपछि मात्र र्‍याफ्टिङ फेरि थालिएको नाराका अध्यक्ष कमल ठकुरीले बताउनुभएको छ।