भारतमा निर्वाचन आयोगविरुद्धको प्रदर्शनमा राहुल गान्धीसहित विपक्षी नेता केहीबेर हिरासतमा

भारतमा मुख्य निर्वाचन आयुक्त ज्ञानेश कुमारको राजीनामा माग्दै प्रदर्शनमा उत्रिएका काङ्ग्रेस नेता राहुल गान्धीसहित विपक्षी सांसदहरूलाई प्रहरीले मङ्गलबार केहीबेर नियन्त्रणमा लिएर छाडेको छ। संसद्बाट नयाँदिल्लीस्थित आयोग मुख्यालयतर्फ हिँडेको इन्डिया गठबन्धनको जुलुसलाई प्रहरीले ब्यारिकेड राखेर रोकेको थियो। एएफपीका अनुसार गान्धी ब्यारिकेडछेउ भारतीय झण्डा हल्लाउँदै उभिनुभएको थियो।

काङ्ग्रेस नेत्री प्रियंका गान्धी वाड्रालाई पनि नियन्त्रणमा लिइएको छ। जुलुसमा समाजवादी पार्टीका अध्यक्ष अखिलेश यादव र टीएमसी नेता अभिषेक बनर्जी सहभागी हुनुहुन्थ्यो। प्रदर्शनकारीले 'भोट चोर, गद्दी छोड' जस्ता नारा लगाएका थिए।

विपक्षी दलहरूले आयोगले प्रधानमन्त्री मोदीको भाजपाको प्रभावमा काम गरेको आरोप लगाउँदै शुक्रबारदेखि प्रदर्शन गरिरहेका छन्। आयोगले भने मतदाता नामावली शुद्ध राख्न संशोधन गरिएको भन्दै आरोप अस्वीकार गरेको छ। आयुक्त कुमारले यसबारे सार्वजनिक टिप्पणी गरेका छैनन्।