महाधिवेशन लम्बिएपछि प्रतिनिधिको थप एक दिनको खर्च कांग्रेसले बेहोर्ने

महाधिवेशन एक दिन लम्बिएपछि नेपाली कांग्रेसले प्रतिनिधिहरूको थप एक दिनको बसाइ र खानपिन खर्च आफैँ बेहोर्ने भएको छ। पार्टीका कोषाध्यक्ष उमेश श्रेष्ठले बिहीबार पत्रकार सम्मेलनमा यो जानकारी दिनुभएको छ। उहाँका अनुसार १५औँ महाधिवेशन असोज २२ गतेभित्रै टुंग्याउने लक्ष्य राखिएको थियो।

मतपत्र छपाइमा ढिलाइ हुँदा नयाँ नेतृत्व चयनको मतदान शुक्रबारका लागि सरेपछि प्रतिनिधिहरूको काठमाडौँ बसाइ लम्बिएको हो। श्रेष्ठले प्रतिनिधिमाथि थप आर्थिक भार नपर्ने गरी पार्टीले आवश्यक प्रबन्ध मिलाउने बताउनुभएको छ। यसअघि पार्टीले खाना र खाजा मात्र उपलब्ध गराएको थियो, होटलको बास खर्च भने प्रतिनिधि आफैँले तिर्नुपर्ने व्यवस्था थियो।

करिब ७ हजार ३ सय प्रतिनिधि महाधिवेशनका लागि राजधानीमा छन्। असोज १८ गतेदेखि सुरु भएको महाधिवेशन खुलामञ्च र राष्ट्रिय सभा गृहमा चलिरहेको छ। महाधिवेशन लम्बिँदा पार्टीको ढुकुटीमा थप आर्थिक भार परेको छ।