लामो दूरीका रात्रिकालीन गाडीमा दुई चालक अनिवार्य, बढी भाडा लिए कारबाही

काठमाडौँ उपत्यका ट्राफिक प्रहरीले चाडपर्वका बेला लामो दूरीमा राति चल्ने सार्वजनिक सवारीसाधनमा दुई चालक राख्नुपर्ने नियम कडाइका साथ लागू गर्ने भएको छ। यो नियम पहिलेदेखि नै लागू भए पनि अब यसको पालना गराउन जाँच र अनुगमन तीव्र बनाइने प्रहरीले जनाएको छ। एक जना मात्र चालक राखेर गाडी चलाएको भेटिए कारबाही गरिनेछ।

उपत्यका ट्राफिक प्रहरी कार्यालयका प्रमुख, प्रहरी वरिष्ठ उपरीक्षक सुरेशप्रसाद काफ्लेका अनुसार चाडपर्वमा यात्रु बढ्ने र रातभर बस चल्ने हुँदा चालक थाकेर हुने दुर्घटना रोक्न यो कदम चालिएको हो। दुई चालक हुँदा उनीहरूले पालो फेरेर गाडी चलाउन सक्ने र लामो यात्रामा थकान कम हुने प्रहरीको भनाइ छ। यात्रुसँग बढी भाडा असुल्नेलाई पनि कारबाही गरिने प्रहरीले जनाएको छ।