बाढीले क्षति पुर्‍याएको राहुघाट जलविद्युत्‌बाट मर्मतपछि फेरि उत्पादन

बाढीले क्षति पुर्‍याएको राहुघाट जलविद्युत् आयोजनाले मर्मतपछि असोज २२ गते बिहीबारदेखि फेरि बिजुली उत्पादन थालेको छ। असोज ११ गते कालीगण्डकी नदीमा आएको बाढीले आयोजनाको विद्युत्गृह डुबाउनुका साथै प्रमुख संरचना र उपकरणमा समेत क्षति पुर्‍याएको थियो। बिजुली निकालेपछि पानी नदीमा फर्काउने टेलरेस गेट बिग्रिँदा त्यही बाटो हुँदै विद्युत्गृहभित्र पानी पसेको थियो।

निर्माण भर्खरै सकेर परीक्षणका रूपमा उत्पादन गरिरहेको आयोजना पानी पसेपछि पूर्ण रूपमा ठप्प भएको थियो। प्रवर्द्धक रघुगङ्गा हाइड्रोपावर लिमिटेडका अनुसार विद्युत्गृहभित्र जमेको पानी पहिले निकालिएको थियो। त्यसपछि बिग्रिएका संरचना र उपकरण मर्मत गरी आवश्यक प्राविधिक काम पूरा गरिएको छ।

कम्पनीका प्रबन्ध सञ्चालक गणेश केसीका अनुसार अहिले २० मेगावाट क्षमताको एउटा युनिट चलाइएको छ। बाढी आएको ११ दिनमै क्षतिग्रस्त भाग बनाएर एउटा युनिटबाट उत्पादन सुरु गर्न सफल भएको केसीले बताउनुभएको छ। उहाँका अनुसार दोस्रो युनिटलाई पनि चाँडै चालु गर्ने तयारीसहित मर्मत काम जारी छ।

कम्पनीका अनुसार आयोजनामा २०–२० मेगावाट क्षमताका दुई युनिट छन्, जसको कुल जडित क्षमता ४० मेगावाट हुन्छ। हाल आयोजना आधा क्षमतामा मात्र चलेको छ। आयोजनाबाट निस्कने बिजुली कालीगण्डकी करिडोर २२० केभी प्रसारण लाइन हुँदै राष्ट्रिय प्रसारण प्रणालीमा जोडिन्छ।