पुस १ देखि स्वास्थ्य बीमामा आबद्ध हुन राष्ट्रिय परिचयपत्र अनिवार्य

स्वास्थ्य बीमा बोर्डले आगामी पुस १ गतेदेखि स्वास्थ्य बीमा कार्यक्रममा राष्ट्रिय परिचयपत्र अनिवार्य गर्ने निर्णय गरेको छ। बोर्डको दोस्रो बैठकको निर्णयअनुसार १६ वर्ष उमेर पूरा गरेका नागरिकलाई बीमामा नयाँ आबद्ध हुन, बीमा नवीकरण गर्न र बीमाअन्तर्गत सेवा लिन राष्ट्रिय परिचयपत्र चाहिनेछ। सामान्य र लक्षित दुवै वर्गका सबै बीमित परिवारले बोर्डको विद्युतीय पोर्टलमा आफ्नो विवरण अनिवार्य रूपमा अद्यावधिक गर्नुपर्नेछ।

यसबाट बीमितको पहिचान पक्का हुने, एउटै व्यक्ति दोहोरो आबद्ध हुने समस्या रोकिने र दाबी व्यवस्थापन थप भरपर्दो हुने बोर्डको अपेक्षा छ। बैठकले सेवा खरिद र भुक्तानी प्रणालीलाई वैज्ञानिक, लागत-प्रभावकारी र दिगो बनाउन रणनीतिक खरिदसम्बन्धी अध्ययन कार्यदल पनि गठन गरेको छ। कार्यदलले ६० दिनभित्र प्रतिवेदन बुझाउनेछ।

प्रतिवेदनमा स्वास्थ्य संस्था छनोट, सम्झौता र भुक्तानीका आधार, सेवा वर्गीकरण तथा कार्यान्वयन योजना समेटिनेछन्।