विश्वकप लिग–२ : ओमानलाई ११३ रनले हराउँदै नेपालको लगातार दोस्रो जित

आईसीसी पुरुष क्रिकेट विश्वकप लिग–२ अन्तर्गत ओमानमा जारी त्रिकोणात्मक शृङ्खलामा नेपालले घरेलु टोली ओमानलाई ११३ रनको फराकिलो अन्तरले पराजित गरेको छ। मंगलबार अल अमेरत क्रिकेट मैदानमा भएको खेलमा नेपालले शृङ्खलामा लगातार दोस्रो जित हासिल गरेको हो।

पहिले ब्याटिङ गरेको नेपालले ओमानलाई जितका लागि २६४ रनको लक्ष्य दिएको थियो। नेपालको इनिङ्समा कप्तान रोहित पौडेलले अर्धशतक बनाए भने करण केसीले विस्फोटक ब्याटिङ गरे।

लक्ष्य पछ्याएको ओमानलाई नेपाली बलरहरूले लक्ष्यभन्दा धेरै टाढै रोके। बलिङमा नन्दन यादव र सन्दीप लामिछानेले उत्कृष्ट प्रदर्शन गरे।

यो शृङ्खला लिग–२ मा नेपालको अन्तिम शृङ्खला हो। लिग–२ को शीर्ष–४ बाट बाहिरिइसकेको नेपालले एकदिवसीय मान्यता जोगाउन शीर्ष–६ भित्र पर्नुपर्नेछ। यो जितले नेपाललाई अंकतालिकामा राहत मिलेको छ।