काठमाडौँ हरर फिल्म फेस्टिभलको दोस्रो संस्करणमा २६ फिल्म छानिए

काठमाडौँ हरर फिल्म फेस्टिभलको दोस्रो संस्करणका लागि २१ देशका २६ वटा फिल्म छनोट भएका छन्। आयोजकका अनुसार फेस्टिभल अक्टोबर ३० देखि नोभेम्बर १ सम्म काठमाडौँस्थित रसियन हाउसमा हुनेछ। अन्तर्राष्ट्रिय आह्वानमार्फत आएका हरर, थ्रिलर, सुपरनेचुरल, डार्क फ्यान्टसी र लोककथामा आधारित फिल्मबाट यो छनोट गरिएको हो।

छानिएकामध्ये ८ वटा फिचर र १८ वटा छोटा फिल्म छन्। तीमध्ये ५ वटा नेपाली निर्माण वा सहनिर्माणका फिल्म रहेका छन्। फिचर खण्डमा सुवर्ण पौडेलको अस्ट्रेलिया र नेपालको सहनिर्माण 'मोक्ष' परेको छ।

आकाश धिमाल, रक्षा थापा र भीमसेन लामाका छोटा फिल्म पनि छनोटमा परेका छन्। बेलायत, सर्बिया, लेबनान, इरान, जापान र ब्राजिललगायत देशका फिल्म पनि प्रदर्शन हुनेछन्। पहिलो संस्करणदेखि आयोजनास्थल साझेदार रहेको रसियन हाउसले यस वर्ष पनि स्थल उपलब्ध गराएको छ।

नेपाल एकेडेमी अफ फिल्म एन्ड कल्चरले सन् २०२५ देखि यो फेस्टिभल सुरु गरेको हो। फेस्टिभलले नेपाली फिल्मकर्मीलाई स्थानीय लोककथा, मिथक र परम्परामा आधारित कथा भन्न प्रोत्साहन गर्ने जनाएको छ। फेस्टिभल निर्देशक रशिक पाठकले हरर विधामार्फत फिल्मकर्मीले लोककथा, मनोविज्ञान, समाज र पहिचानका विषय उठाउने बताउनुभएको छ।

उहाँका अनुसार यस संस्करणले नेपाली फिल्मकर्मीलाई विदेशी फिल्मकर्मीसँग जोड्ने लक्ष्य राखेको छ।