श्रीलङ्कालाई आईएमएफको नयाँ किस्ता

अन्तर्राष्ट्रिय मुद्रा कोष आइएमएफले आर्थिक सङ्कटबाट उकालो लागिरहेको श्रीलङ्कालाई नयाँ रकम दिने प्रारम्भिक सहमति गरेको छ। आइएमएफका अनुसार करिब २ अर्ब ९० करोड अमेरिकी डलरको पुनरुत्थान कार्यक्रमअन्तर्गत झन्डै ३४ करोड ५० लाख डलर उपलब्ध गराइनेछ। सन् २०२२ मा करिब ४६ अर्ब डलरको विदेशी ऋण तिर्न नसकेपछि श्रीलङ्का गम्भीर आर्थिक सङ्कटमा परेको थियो।

त्यसयता पुनरुत्थानको क्रममा भएको यो सहमति महत्त्वपूर्ण उपलब्धि भएको आइएमएफले जनाएको छ। तर उच्च ऊर्जा मूल्य, एल निनोको जलवायु असर र मध्यपूर्वको द्वन्द्वले सुधारमा जोखिम बढाउन सक्ने चेतावनी कोषले दिएको छ। विश्व व्यापार नीतिमा आएको फेरबदलले पनि आर्थिक सुधारमा नकारात्मक असर पार्न सक्ने कोषको भनाइ छ।