दुर्घटनाका घाइतेलाई सघाउनेलाई कानुनी संरक्षण दिने विधेयक

सडक दुर्घटनामा घाइते भएकालाई तत्काल सहयोग गर्ने व्यक्तिलाई कानुनी संरक्षण दिने व्यवस्थासहितको विधेयक सरकारले प्रतिनिधिसभामा दर्ता गरेको छ। राष्ट्रिय सडक सुरक्षा विधेयक, २०८३ अनुसार दुर्घटनास्थलमा प्राथमिक उपचार गर्ने वा घाइतेलाई अस्पताल पुर्‍याउने व्यक्तिलाई देवानी वा फौजदारी कारबाहीमा तानिने छैन। असल नियतले सहयोग गरेको अवस्थामा उद्धारकर्तामाथि पछि कानुनी प्रश्न उठाउन नपाइने प्रावधान पनि विधेयकमा छ।

सरकारी तथा गैरसरकारी सबै स्वास्थ्य संस्थाले ढिलाइ नगरी घाइतेको उपचार सुरु गर्नुपर्ने व्यवस्था गरिएको छ। लोकमार्गका सहरी क्षेत्रमा अत्याधुनिक ट्रमा सेन्टर, निश्चित दूरीमा एम्बुलेन्स सेवा र घाइतेको उपचारका लागि एकद्वार प्रणाली लागू गरिने विधेयकमा उल्लेख छ। सडक दुर्घटनाबाट हुने मानवीय र आर्थिक क्षति घटाउँदै यातायात प्रणालीलाई सुरक्षित र भरपर्दो बनाउने उद्देश्यले सरकारले कडा कानुनी प्रावधानसहित यो विधेयक ल्याएको हो।