चोरखोलामा पहिरो पन्छाइयो, पूर्व–पश्चिम राजमार्ग सुचारु

दाङको चोरखोला नजिक पूर्व–पश्चिम राजमार्गमा खसेको पहिरो हटाइएपछि सडक फेरि सञ्चालनमा आएको छ। लगातार परेको वर्षाले खसेको पहिरोका कारण उक्त खण्डमा केही समय आवागमन अवरुद्ध हुँदा राजमार्गमा सवारीसाधन रोकिएका थिए। सशस्त्र प्रहरी बल नेपाल २९ नम्बर गण हेडक्वार्टर भालुबाङका प्रहरी उपरीक्षक यदु कार्कीले पहिरो पन्छाएर सडक पूर्ण रूपमा खुला गरिएको बताउनुभएको छ।

पहिरो हटाउने काममा सुरक्षाकर्मी र सम्बन्धित निकायको टोली खटिएको थियो। सडक खुलेसँगै बाटोमा अड्किएका सवारीसाधन गन्तव्यतर्फ अघि बढेका छन्। राजमार्गमा आवागमन सामान्य भए पनि वर्षाका कारण विभिन्न ठाउँमा पहिरोको जोखिम कायम रहेकाले यात्रुलाई सतर्क भएर यात्रा गर्न प्रहरीले आग्रह गरेको छ।

जल तथा मौसम विज्ञान विभागका अनुसार देशमा अहिले पश्चिमी न्यून चापीय प्रणाली र मनसुनी वायुको प्रभाव छ। विभागको पूर्वानुमानअनुसार बुधबार दाङ पर्ने लुम्बिनी प्रदेशको पहाडी र तराई भू-भाग तथा गण्डकीको पहाडी भू-भागका एक–दुई स्थानमा भारी वर्षाको सम्भावना छ। बिहीबार भने बागमती र गण्डकी प्रदेशका पहाडी र तराई भू-भागका एक–दुई स्थानमा भारी वर्षा हुन सक्ने विभागले जनाएको छ।

बिहीबार लुम्बिनीको तराईका एक–दुई स्थानमा मेघगर्जन र चट्याङसहित मध्यमसम्मको वर्षाको सम्भावना छ। विभागका अनुसार पोखरामा वर्षाको सम्भावना ४० प्रतिशत छ। लुम्बिनीकै नेपालगञ्जमा बिहान हुस्सु लाग्ने र तापक्रम २२ देखि २४ डिग्री सेल्सियस रहने विभागको अनुमान छ।