कांग्रेस उम्मेदवारको अन्तिम सूची: सभापतिमा थापा र खड्गीबीच प्रतिस्पर्धा, करिब ४० जना पछि हटे

नेपाली कांग्रेसको सभापति पदमा गगनकुमार थापा र श्यामकृष्ण खड्गीबीच प्रतिस्पर्धा हुने भएको छ। केन्द्रीय निर्वाचन समितिले दाबी–विरोधको छानबिन र उम्मेदवारी फिर्ताको प्रक्रिया सकेर असोज २१ गते राति उम्मेदवारको अन्तिम नामावली सार्वजनिक गरेको छ। वरिष्ठ उपसभापतिमा विश्वप्रकाश शर्मा, महिला उपसभापतिमा पुष्पा भुसाल र काठमाडौँ उपत्यका महिला केन्द्रीय सदस्यमा अमिता प्रधान शाक्य निर्विरोध निर्वाचित हुनुभएको छ।

खुलातर्फका दुई उपसभापति पदका लागि सात जना र समावेशी उपसभापतिको एक पदका लागि पाँच जना मैदानमा छन्। खुला उपसभापतिमा गोविन्द भट्टराई, चन्द्रकान्त भण्डारी, चन्द्रमोहन यादव, दीपक गिरी, धनराज गुरुङ, मधु आचार्य र सुरेन्द्रराज पाण्डे उम्मेदवार हुनुहुन्छ। तीन महामन्त्रीमध्ये खुलातर्फका दुई पदमा आठ जनाबीच प्रतिस्पर्धा छ।

३५ वर्षमुनिका युवा खुला समूहमा २७ जना उम्मेदवार छन्। पार्टी प्रवक्ता देवराज चालिसेका अनुसार करिब ४० जनाले उम्मेदवारी फिर्ता लिएका छन्। फिर्ता लिनेमा सभापतिका उम्मेदवार किशोरसिंह राठौर, उपसभापतिका उम्मेदवार मीनेन्द्र रिजाल र चालिसे आफैँ पनि हुनुहुन्छ।

राठौरले थापालाई समर्थन गर्दै उम्मेदवारी फिर्ता लिनुभएको छ। सहमतिका लागि छलफल भए पनि निष्कर्षमा नपुगेकाले आफ्नो उम्मेदवारी कायमै रहेको खड्गीले बताउनुभएको छ।