बन्दसत्रबाट चार प्रतिवेदन पारित, थापा: पार्टीमा अब कुनै गुट छैन

नेपाली कांग्रेसको १५औँ महाधिवेशनको बन्दसत्रले सभापति गगन थापाले पेस गरेको 'राष्ट्रिय पुनर्जागरण र समुन्नति' सम्बन्धी राजनीतिक प्रस्ताव सर्वसम्मत पारित गरेको छ। उपसभापति विश्वप्रकाश शर्माको राजनीतिक संस्कृतिको क्षयसम्बन्धी समसामयिक प्रस्ताव, महामन्त्री गुरुराज घिमिरेको सङ्गठन प्रतिवेदन र कोषाध्यक्ष उमेश श्रेष्ठको आर्थिक प्रतिवेदन पनि पारित भएका छन्। बुधबार बिहान साढे १० बजे बोलाइएको बन्दसत्र खराब मौसमका कारण अपराह्न ४ बजे मात्र सुरु भएको थियो।

समापनमा बोल्दै सभापति थापाले पार्टीभित्रका देउवा, कोइराला, पौडेल, विशेष र नियमितलगायत सबै समूह आजदेखि सकिएको घोषणा गर्नुभएको छ। उहाँले प्रतिनिधिलाई कुनै समूहको प्रभावमा नपरी विवेकका आधारमा मत दिन आग्रह गर्नुभएको छ। महाधिवेशनस्थल आउने बाटोमा 'गगन थापा समूह' लेखिएको चिट बाँडिएको देखेको उहाँले बताउनुभएको छ।

थापाले निवर्तमान सभापति शेरबहादुर देउवाको योगदान सम्झँदै वरिष्ठ नेताहरू मञ्चमा नहुँदा नमीठो लागेको बताउनुभएको छ। पार्टीमा सभापतिको हक र हैसियत भुइँमा बस्ने कार्यकर्ताकै बराबर हुने उहाँको भनाइ छ। महाधिवेशनलगत्तै स्थानीय तहको निर्वाचनसम्म दिनरात खटिने उहाँको प्रतिबद्धता छ।

संसदीय दलका नेता भीष्मराज आङ्देम्बेले यसपटक नीति र भावी कार्यदिशामा छलफल भएकाले यो महाधिवेशन नौलो भएको बताउनुभएको छ। पार्टी विधानअनुसार २४ पदाधिकारीमध्ये १९ जना निर्वाचनबाट र पाँच जना सभापतिको मनोनयनबाट आउनेछन्।