पाटा नेपाल च्याप्टरको अध्यक्षमा नरेन्द्रदेव भट्ट

प्यासिफिक एसिया ट्राभल एसोसिएसन, अर्थात् पाटाको नेपाल च्याप्टरको अध्यक्षमा नरेन्द्रदेव भट्ट निर्वाचित हुनुभएको छ। च्याप्टरको ५१औँ वार्षिकोत्सवसँगै आज भएको निर्वाचनले हेरिटेज टुर्स एण्ड ट्राभलका प्रबन्ध निर्देशक भट्टको नेतृत्वमा नयाँ कार्यसमिति चुनेको छ। महासचिवमा स्क्वायर होटलकी प्रबन्ध निर्देशक रोमी अर्याल र कोषाध्यक्षमा अल्पाइन रेस्क्यु सर्भिसका अध्यक्ष प्रकाशचन्द्र लोहनी चुनिनुभएको छ।

हिमालय एयरलाइन्सका उपाध्यक्ष विजय श्रेष्ठ, जङ्गल सफारी लजका सुमन घिमिरे र पार्क भिलेज होटल एण्ड रिसोर्टकी माया शाक्यसहित सात जना कार्यसमिति सदस्य बन्नुभएको छ। दिनेश महर्जन र जान विश्वकर्मासहित सात जना पोक्सी सदस्यमा चुनिनुभएको छ। कार्यसमितिमा सरकारी निकायको पनि प्रतिनिधित्व हुने व्यवस्थाअनुसार नेपाल पर्यटन बोर्डका प्रमुख कार्यकारी अधिकृत प्रथम उपाध्यक्ष रहनेछन्।

पर्यटन विभाग र नेपाल नागरिक उड्डयन प्राधिकरणका महानिर्देशक पदेन सदस्य हुनेछन्। अध्यक्ष भट्टले पर्यटन क्षेत्रको पुनरुत्थान, प्रभावित समुदाय र गन्तव्यलाई सहयोग तथा उद्योगलाई एकजुट पार्ने प्रतिबद्धता जनाउनुभएको छ। समारोहमा भोटेकोशी बाढी सङ्कटका बेला र अन्य अवसरमा देखाएको साहस तथा पर्यटनमा पुर्‍याएको योगदानका लागि सात व्यक्तिलाई सम्मान गरिएको छ।

सम्मानित हुनेमा सुरुङ विशेषज्ञ प्राध्यापक आर्नल्ड डिक्स र नेपालकी पहिलो महिला हेलिकप्टर क्याप्टेन प्रिया अधिकारी पनि हुनुहुन्छ। निवर्तमान अध्यक्ष खेम लकाईले सदस्य र सरोकारवालालाई निरन्तर सहयोगका लागि धन्यवाद दिनुभएको छ।