इरानको युद्धविराम र होर्मुज प्रस्ताव ट्रम्पद्वारा अस्वीकार, इरानको चेतावनी

अमेरिकी राष्ट्रपति डोनाल्ड ट्रम्पले युद्धविराम र होर्मुज जलमार्ग खोल्नेसम्बन्धी इरानको नयाँ प्रस्ताव अस्वीकार गर्नुभएको छ। अमेरिकी पत्रिका वाल स्ट्रिट जर्नलले यो जानकारी दिएको हो। इरानी विदेशमन्त्री अब्बास अराघचीले न्युयोर्कमा मध्यस्थकर्तामार्फत सात दिने युद्धविराम र सात दिनभित्र जलमार्ग पुनः सञ्चालन गर्ने प्रस्ताव राख्नुभएको थियो।

उक्त प्रस्ताव गत जुनमा भएको समझदारीमा आधारित थियो, जसमा इरानी तेल निर्यातमा प्रतिबन्ध खुकुलो पार्ने र जलमार्गमा पानीजहाजको आवतजावत सामान्य बनाउने कुरा समेटिएको थियो। पत्रिकाका अनुसार इरानले सर्त पालना गर्नेमा अमेरिका सशंकित छ र ऊ आणविक कार्यक्रमसमेत समेट्ने फराकिलो सम्झौता चाहन्छ। ट्रम्पले इरानमाथि फेरि बमबारी सुरु हुनसक्ने चेतावनी दिनुभएको छ।

राष्ट्रसंघको ८१औँ महासभामा उहाँले इरानसामु ध्वस्त हुने वा क्षतिपूर्ति पाएर पुनर्निर्माणसहित बलियो राष्ट्र बन्ने विकल्प रहेको बताउनुभएको थियो। विदेशमन्त्री अराघचीले शुक्रबार राष्ट्रसंघ मुख्यालयमा पत्रकारहरूसँग कुरा गर्दै अमेरिकाले सम्झौताका सर्त पूरा गरेपछि मात्र जलमार्ग खोल्ने प्रक्रिया अघि बढ्ने बताउनुभएको थियो। इरानले सम्झौताका लागि आफूलाई कुनै हतार नभएको जनाएको छ।

यसैबीच इरानको उच्च सैन्य कमान्डले आफूमाथि आक्रमण भए अमेरिकी सैन्य केन्द्रहरू ध्वस्त पार्ने चेतावनी दिएको छ। अर्धसरकारी समाचार संस्था मेहरका अनुसार इरानले युद्ध सुरु नगर्ने तर हमला भए प्रतिरक्षामा कुनै कसर बाँकी नराख्ने जनाएको छ।