कम दृश्यताले आन्तरिक उडान प्रभावित, कतिपय उडान रद्द

कम दृश्यताका कारण तुम्लिङटार, भरतपुर र पोखरा विमानस्थलका आन्तरिक उडान प्रभावित भएका छन्। त्रिभुवन अन्तर्राष्ट्रिय विमानस्थल कार्यालयका अनुसार तुम्लिङटारका लागि बुद्ध एयरको निर्धारित उडान रद्द भएको छ। भरतपुरतर्फ बुद्ध एयरका ३ उडान रद्द भएका छन्।

पोखरामा मौसम खुल्ने प्रतीक्षामा केही उडान ढिला भएका छन्। बुद्ध एयरका सूचना अधिकारी दीपेन्द्र कर्णका अनुसार बिहीबारदेखिको निरन्तर वर्षा र धुम्म मौसमले ती विमानस्थलमा दृश्यता घटेको छ। मौसमकै कारण हिमाल अवलोकन उडान पनि स्थगित गरिएको छ।

यती एयरलाइन्सका प्रवक्ता सुदर्शन बर्तौलाले दृश्यता नपुग्दा पोखरा उडान हुन नसकेको बताउनुभएको छ। यतीले उडान ढिलाइ र समय परिवर्तन हुन सक्ने भन्दै यात्रुलाई विमानस्थल जानुअघि वेबसाइट वा मोबाइल एपमा उडानको अवस्था हेर्न अनुरोध गरेको छ। मौसममा सुधार नआएसम्म र आवश्यक दृश्यता नपुगेसम्म ती विमानस्थलमा उडान नहुने बताइएको छ।

उडान हुन नसक्दा बिहानै विमानस्थल पुगेका यात्रु त्यहीँ रोकिनुपरेको छ। अन्य आन्तरिक गन्तव्यमा उडान भइरहेका छन् भने अन्तर्राष्ट्रिय उडान सामान्य रूपमा सञ्चालन भइरहेको विमानस्थल कार्यालयले जनाएको छ। जल तथा मौसम विज्ञान विभागले आज पोखरामा मेघगर्जनसहित भारी वर्षाको १०० प्रतिशत सम्भावना औँल्याएको छ भने काठमाडौँमा वर्षाको सम्भावना ९० प्रतिशत छ।