कञ्चनपुरमा जोखिममा परेका परिवार सुरक्षित स्थानमा, धौलीगङ्गा बाँध खोलिँदा महाकाली तटमा सतर्कता

भारी वर्षाको जोखिम देखिएपछि कञ्चनपुरको दोधारा चाँदनी नगरपालिका–३ पटराखल्लाका करिब ९ परिवारलाई सुरक्षित स्थानमा सारिएको छ। जिल्ला प्रहरी कार्यालय कञ्चनपुरका सूचना अधिकारी टेक रावतका अनुसार जोगबुडा नदीको पानी बस्तीमा पस्न सक्ने आशङ्काले उनीहरूलाई नजिकैको वडा कार्यालय र जमुनाघाडी विद्यालयमा राखिएको छ। सशस्त्र प्रहरी र स्थानीयको सहयोगमा खाद्यान्न र पशुचौपाया पनि सारिएको छ।

वडा नम्बर १० कुतियाकबरका बासिन्दाले पनि अन्न, प्राथमिक उपचार सामग्री र कागजात सेफ हाउसमा राखेका छन्। रावतका अनुसार महाकाली नदीको बहाव हाल करिब ३४ हजार क्युसेक छ। जिल्लामा तीनवटै सुरक्षा निकायलाई उच्च सतर्कतामा राखिएको छ।

सशस्त्र प्रहरीले पुनर्वास, बेलौरी, दोधारा चाँदनीको देवीस्थान, भीमदत्तको मझगाउँ र शुक्लाफाँटामा रबर बोटसहित उद्धार टोली तयारी अवस्थामा राखेको छ। जिल्ला प्रशासन कार्यालयले तटीय र डुबान जोखिमका क्षेत्रका बासिन्दालाई आवश्यक सावधानी अपनाउन आग्रह गरेको छ। यसैबीच भारतको उत्तराखण्डस्थित धौलीगङ्गा जलविद्युत् आयोजनाको बाँध सिल्ट सफाइका लागि आइतबार राति १२ बजेदेखि सोमबार बिहान १० बजेसम्म खोलिने भएको छ।

बैतडीकी प्रमुख जिल्ला अधिकारी मीना अर्यालले महाकालीको जलस्तर बढ्न सक्ने भएकाले तटीय बासिन्दालाई नदीकिनार नजान आग्रह गर्नुभएको छ।