ट्रम्पद्वारा सीएनएनसहित तीन सञ्चारमाध्यमलाई ह्वाइट हाउस प्रवेशमा रोक

अमेरिकी राष्ट्रपति डोनाल्ड ट्रम्पले ह्वाइट हाउसमा सीएनएन, एमएस नाउ र पोलिटिकोका पत्रकारको प्रवेश रोक्ने घोषणा गर्नुभएको छ। ट्रम्पले शुक्रबार ट्रुथ सोसलमा लेख्दै ती संस्थाले आफ्नो प्रशासनबारे लगातार झुटा सामग्री प्रकाशन गरेको आरोप लगाउनुभएको छ। ओभल अफिसमा प्रश्नको जवाफ दिँदै उहाँले कुनै एउटा घटनाभन्दा पनि विगत केही वर्षका समाचारको समग्र असरका आधारमा निर्णय लिएको बताउनुभएको छ।

अरू सञ्चारमाध्यमलाई पनि यस्तै रोक लाग्न सक्ने सङ्केत उहाँले दिनुभएको छ। पोलिटिकोको प्रसङ्गमा उहाँले पूर्वराष्ट्रपति जो बाइडेनको कार्यकालमा सरकारी निकायले त्यसका सामग्री र सदस्यतामा ठूलो रकम खर्चेको विषय उठाउनुभएको छ। रोक कसरी कार्यान्वयन हुन्छ भन्ने विवरण सार्वजनिक भएको छैन।

शुक्रबार अपराह्नसम्म तीनवटै संस्थाका पत्रकार ह्वाइट हाउस परिसरमै काम गरिरहेको जनाइएको छ। सीएनएनले यो कदमलाई प्रेस स्वतन्त्रतामाथिको गैरकानुनी हमला भन्दै संविधानले सरकारी अवरोधबिना समाचार सङ्कलनको अधिकार दिएको जनाएको छ। पोलिटिकोले आफ्नो संवैधानिक अधिकार कुण्ठित गर्ने प्रयासको प्रतिवाद गर्ने जनाएको छ भने एमएस नाउले प्रतिक्रिया दिन अस्वीकार गरेको छ।

ह्वाइट हाउस करेस्पोन्डेन्ट्स एसोसिएसनकी अध्यक्ष ज्याकी हेनरिकले काम गरेकै कारण निशाना बनाइएका पत्रकारको पक्षमा उभिएको बताउनुभएको छ। राष्ट्रिय प्रेस क्लबका अध्यक्ष मार्क स्कोफले यसलाई राष्ट्रपतिको शक्ति प्रयोगमाथि निगरानी गर्ने आवाज दबाउने प्रयास भन्नुभएको छ।