सेनाले विस्फोट गराएर चट्टान हटायो, तीन महिनापछि खाँदबारी–किमाथाङ्का सडक खुल्यो

सङ्खुवासभामा तीन महिनादेखि अवरुद्ध खाँदबारी–किमाथाङ्का सडकखण्ड सोमबार साँझदेखि फेरि सञ्चालनमा आएको छ। नेपाली सेनाको प्रयासपछि यो सडक खुलेको हो।

भोटखोला गाउँपालिका–२ स्थित छुम्सुरमा पहिरोसँगै खसेको विशाल चट्टानले सडक अवरुद्ध बनाएको थियो। नेपाली सेनाले ब्लास्टिङ गरेर उक्त चट्टान पन्छाएपछि सडकमा फेरि सवारीसाधन चल्न थालेका हुन्।

चीनसँगको उत्तरी सीमावर्ती नाका किमाथाङ्का जोड्ने यो सडकलाई नेपाल–चीन जोड्ने 'लाइफलाइन' मानिन्छ। रणनीतिक महत्त्वको यो सडकखण्ड विगत तीन महिनादेखि अवरुद्ध थियो।

सडक लामो समय अवरुद्ध भएपछि सेनाले आवश्यक काम गरेर यसलाई सञ्चालनमा ल्याएको हो।