छुमसुरको चट्टानसहितको पहिरो हटाइयो, किमाथाङ्का सडक खुल्यो

सङ्खुवासभाको खाँदबारी–किमाथाङ्का सडकखण्डमा पर्ने भोटखोला गाउँपालिका–२ छुमसुरमा खसेको विशाल चट्टानसहितको पहिरो विस्फोटक पदार्थ प्रयोग गरेर हटाइएको छ। पहिरो हटेपछि चीनसँग सीमा जोडिएको किमाथाङ्का नाकासम्म एकतर्फी यातायात सुरु भएको छ। उत्तर–दक्षिण कोशी सडक योजनाका प्रमुख रामबहादुर गुरुङका अनुसार नेपाली सेनाले आइतबार विस्फोट गराएर चट्टान हटाएको हो।

चट्टान ठूलो भएकाले सामान्य उपकरणले हटाउन नसकेपछि आयोजनाले सेनासँग सहयोग मागेको थियो। सेना र सडक कार्यालयको प्राविधिक टोली मिलेर पहिरो पन्छाइएको गुरुङले बताउनुभएको छ। गत साउनमा भारी वर्षाका बेला खसेको पहिरोले सडक अवरुद्ध हुँदा उत्तरी क्षेत्रमा दैनिक आवतजावत र खाद्यान्न ढुवानीमा समस्या परेको थियो।

सडक खुलेपछि चाडपर्वमा घर फर्कने यात्रु, स्थानीय बासिन्दा र मालवाहक सवारीलाई सहज भएको छ।