पश्चिमी वायुको आंशिक प्रभाव, कोशी र गण्डकीका हिमाली र पहाडी भागमा हल्का वर्षाको सम्भावना

हाल नेपालमा पश्चिमी वायुको आंशिक प्रभाव रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ। महाशाखाका अनुसार भारतको उत्तर प्रदेशमा रहेको न्यून चापीय क्षेत्रको पनि आंशिक प्रभाव छ।

यसको प्रभावले आज बुधबार देशका अधिकांश भूभागमा आंशिक बदली रहने छ। विशेषगरी हिमाली र पहाडी भूभागमा आंशिक बादल लाग्ने महाशाखाले जनाएको छ।

कोशी र गण्डकी प्रदेशका हिमाली तथा पहाडी भूभागका एक/दुई ठाउँमा हल्का वर्षाको सम्भावना रहेको पूर्वानुमान छ।

आगामी तीन दिनसम्म पनि देशका हिमाली तथा पहाडी भूभागमा आंशिक बदली रहने र केही स्थानमा हल्का वर्षा हुने महाशाखाले जनाएको छ। यस अवधिमा कतै हल्का हिमपात र कतै हुस्सु तथा कुहिरो लाग्ने सम्भावना पनि रहेको छ।