जिल्ला फुटबल: व्याकुल माइला गोल्डकप हर्कपुरलाई, सङ्खुवासभा गोल्डकपमा लोहरुङ र सेकाहा सेमिफाइनलमा

ओखलढुङ्गामा सम्पन्न दशौँ व्याकुल माइला गोल्डकप फुटबलमा ज्वालामुखी युवा समूह हर्कपुर विजेता बनेको छ। मानेभञ्ज्याङ गाउँपालिका–६ सोक्मटारमा मंगलबार भएको फाइनलमा निर्धारित समय गोलरहित बराबरीमा सकिएपछि ज्वालामुखीले सप्तरङ्गी युवा समूहलाई पेनाल्टी सुटआउटमा ५–४ ले हराएको छ। विजेताले ३ लाख ३३ हजार ३३३ रुपैयाँ र उपविजेताले १ लाख ५० हजार १११ रुपैयाँ पुरस्कार पाएका छन्।

अन्तिम चारसम्म पुगेका दूधकौशिका आधारभूत विद्यालय र मानेभञ्ज्याङ युवा समूहले प्रत्येक ८० हजार रुपैयाँ पाएका छन्। प्रतियोगिता नयाँ नेपाल सरोकार समाजले राष्ट्रिय गीतका सर्जक प्रदीपकुमार राई, अर्थात् व्याकुल माइलाको जन्मथलोमा गराएको हो। सँगै भएको तेस्रो रूपा स्मृति महिला फुटबलमा ओखलढुङ्गाले खोटाङलाई ट्राइब्रेकरमा ३–१ ले हराउँदै उपाधि जितेको छ।

सङ्खुवासभा गोल्डकपमा भने लोहरुङ क्लब पाङ्मा र सेकाहा सामुदायिक क्लब, दुवै आयोजक जिल्लाका टोली, अन्तिम चारमा पुगेका छन्। खाँदबारी नगरपालिका–३ मानेभञ्ज्याङमा भएको खेलमा लोहरुङ र सिरहाको सलहेश युवा क्लबबीच निर्धारित समयमा २–२ को बराबरी भएको थियो। ट्राइब्रेकरमा पनि ४–४ गोल भएपछि लोहरुङले सडन डेथमा ६–५ ले जित निकालेको छ।

अर्को खेलमा मिलन लिम्बुले गरेका दुवै गोलको मद्दतमा सेकाहाले झापा–११ लाई २–० ले पराजित गरेको छ। बुधबार हुने सेमिफाइनलमा लोहरुङ र सेकाहा भिड्नेछन् भने अर्को खेल सुनसरीको न्यू स्टार क्लब र काठमाडौँको प्लानिङ ब्वाइज युनाइटेड क्लबबीच हुनेछ।