समर्थन जुटाउन जेलेन्स्की बर्लिनमा, अबु धाबीमा त्रिपक्षीय वार्ताको अमेरिकी तयारी

युक्रेनका राष्ट्रपति भोलोदिमिर जेलेन्स्की रुसी आक्रमणविरुद्ध अन्तर्राष्ट्रिय समर्थन जुटाउन मङ्गलबार जर्मनीको राजधानी बर्लिन पुग्नुभएको छ। सामाजिक सञ्जाल एक्समा उहाँले भ्रमणका क्रममा कूटनीतिक समन्वय, हवाई प्रतिरक्षा सुदृढीकरण र ऊर्जा क्षेत्रको सहयोगबारे छलफल हुने जनाउनुभएको छ। यो भ्रमण सुरक्षा तथा प्रतिरक्षासम्बन्धी एक सम्मेलनकै समयमा परेको छ, जसको उद्घाटन लिथुआनियाका राष्ट्रपति गितानास नौसेदाले गर्ने कार्यक्रम छ।

जेलेन्स्कीले नियममा आधारित अन्तर्राष्ट्रिय व्यवस्थाको रक्षा सबैको साझा चासो भएको उल्लेख गर्नुभएको छ। जर्मन चान्सलर फ्रेडरिक मेर्जले नोभेम्बरको मध्यतिर युक्रेनका सहयोगी राष्ट्रहरूको समूह 'कोएलिसन अफ द विलिङ'को बैठक बोलाउने योजना सुनाइसक्नुभएको छ। अमेरिकी राष्ट्रपति डोनाल्ड ट्रम्पका विशेषदूत स्टिभ विटकफले नोभेम्बर १० र ११ मा संयुक्त अरब अमिरातको अबु धाबीमा युक्रेन, रुस र अमेरिकाबीच त्रिपक्षीय वार्ता हुने घोषणा गर्नुभएको छ।

वार्तामा युद्ध अन्त्य, युद्धपछिको सुरक्षा व्यवस्था, तनाव घटाउने उपाय र मानवीय सहायताबारे छलफल हुने उहाँले बताउनुभएको छ। रोयटर्सका अनुसार अमेरिकाको तर्फबाट विटकफ र जारेड कुश्नर मुख्य वार्ताकार हुनेछन्। सेन्ट पिटर्सबर्गमा विटकफसँगको भेटपछि रुसी राष्ट्रपति भ्लादिमिर पुटिन यो वार्तामा बस्न सहमत हुनुभएको हो।

त्यसअघि अमेरिकी वार्ताकारले यसै साता ब्रसेल्समा फ्रान्स, जर्मनी, बेलायत, युरोपेली संघ र नेटोका प्रतिनिधिसँग युक्रेनको सुरक्षा प्रत्याभूति र पुनर्निर्माणबारे छलफल गर्ने कार्यक्रम छ।