इरान–अमेरिका तनाव: युद्धले कसैलाई फाइदा नहुने इरानी राष्ट्रपतिको भनाइ, तेहरानमा धम्कीपूर्ण होर्डिङ

इरानका राष्ट्रपति मसुद पेजेस्कियनले युद्ध फेरि सुरु भए कसैलाई फाइदा नहुने बताउनुभएको छ। होर्मुज जलसन्धिमा पर्ने इरानी टापु केसममा अमेरिकी आक्रमण भएको खबर आएको केही घण्टापछि मङ्गलबार उहाँले यस्तो भनाइ राख्नुभएको हो। अमेरिकी सञ्चारमाध्यमले नाम नखुलाइएका अधिकारीलाई उद्धृत गर्दै ती आक्रमण रक्षात्मक प्रकृतिका रहेको जनाएका छन्, तर अमेरिकी सेन्ट्रल कमान्डले तत्काल प्रतिक्रिया दिएको छैन।

इरानी सरकारी समाचार संस्था इर्नाका अनुसार टापुमा करिब ५ वटा विस्फोट भएका थिए। इरानको रिभोल्युसनरी गार्डले होर्मोज्गान प्रान्तको बन्दरखमीर सहरमाथि २ वटा अमेरिकी ड्रोन खसालेको दाबी गरेको छ, जसबारे अमेरिकाले आधिकारिक प्रतिक्रिया दिएको छैन। संसद्का सभामुख मोहम्मद बागेर गालिबाफले इरान युद्धका लागि तयार रहेको र युद्ध रोक्ने निर्णय अमेरिकाकै हातमा रहेको बताउनुभएको छ।

अर्कोतर्फ, अमेरिकी राष्ट्रपति डोनाल्ड ट्रम्पले इरानसँग सम्झौता हुन सक्ने बताउनुभएको छ। विदेशमन्त्री अब्बास अराघचीले अप्रत्यक्ष वार्ता जारी रहेको पुष्टि गर्नुभएको छ। मध्यस्थता गरिरहेको कतारका परराष्ट्र प्रवक्ता माजेद अल अन्सारीले दुवै पक्षबीच प्रस्ताव आदानप्रदान भइरहेको जानकारी दिनुभएको छ।

इरानी परराष्ट्र प्रवक्ता इस्माइल बाकायीका अनुसार रोक्का सम्पत्ति फुकुवा, तेल प्रतिबन्ध हटाउने र बन्दरगाह नाकाबन्दी अन्त्यको माग पूरा भए करिब २ दिनभित्र जलमार्ग खोल्न सकिन्छ। यसैबीच, राजधानी तेहरानमा ट्रम्पविरुद्ध धम्कीपूर्ण सन्देशसहितका ठूला होर्डिङ बोर्ड राखिएका छन्।