एनपीएल: लुम्बिनीको कसिलो बलिङसामु पोखरा ९७ रनमा सीमित, ९८ रनको लक्ष्य

नेपाल प्रिमियर लिग (एनपीएल) को तेस्रो संस्करणअन्तर्गत मंगलबारको दोस्रो खेलमा पोखरा एभेन्जर्सले लुम्बिनी लायन्सलाई जितका लागि ९८ रनको लक्ष्य दिएको छ। कीर्तिपुरस्थित त्रिवि अन्तर्राष्ट्रिय क्रिकेट मैदानमा जारी प्रतियोगिताको १३औं खेलमा टस जितेर लुम्बिनीले पहिले फिल्डिङ गरेको थियो।

टस हारेर पहिले ब्याटिङ गरेको पोखराले निर्धारित २० ओभरमा ९ विकेट गुमाएर ९७ रन मात्र बनायो। लुम्बिनीको कसिलो बलिङसामु पोखराको टोली १०० रन पनि कटाउन सकेन। सेतोपाटीका अनुसार लुम्बिनीका ट्रम्पलम्यानको बलिङ पोखराका लागि घातक बन्यो।

पोखराका लागि चमिका करुणारत्नेले सर्वाधिक २५ रन बनाए। कप्तान कुशल भुर्तेलले १४, महेदी हसनले १३ र ठगुन्नाले १२ रन जोडे। अन्य ब्याटरले दोहोरो अंकमा रन बनाउन सकेनन्।

खेलको क्रममा पोखराले नियमित अन्तरालमा विकेट गुमाउँदै गएको थियो। अब लुम्बिनी लायन्सले जितका लागि २० ओभरमा ९८ रन बनाउनुपर्नेछ।