पत्रकार पक्राउबारे सरकार: प्रहरीले सरकारको पूर्वअनुमतिबिना सोधपुछ गरेको हो

सरकारका प्रवक्ता तथा शिक्षामन्त्री सस्मित पोखरेलले पत्रकारलाई धरपकड गर्ने सरकारको कुनै नीति नभएको दाबी गरेका छन्। मंगलबार मन्त्रिपरिषद् बैठकका निर्णय सुनाउने क्रममा उनले विभिन्न सञ्चारमाध्यमका पत्रकार पक्राउको विषय प्रहरीको आन्तरिक विषय भएको बताए।

प्रवक्ता पोखरेलका अनुसार प्रकाशित समाचारहरू कसरी तयार भए भन्ने बुझ्नका लागि मात्रै प्रहरीले सामान्य सोधपुछ गरेको हो। प्रहरीले सरकारसँग पूर्वअनुमति लिएर उक्त काम नगरेको उनको दाबी थियो। प्रहरीले समाचारकक्षभित्र प्रवेश गरी पत्रकारसँग सोधपुछ गर्ने कार्यमा सरकारको पूर्ण स्वीकृति नभएको पनि सरकारले जनाएको छ।

सोही क्रममा प्रवक्ता पोखरेलले प्रधानमन्त्रीले प्रहरी महानिरीक्षक (आईजीपी) को राजीनामा मागेको भन्ने हल्ला पूर्णतः भ्रामक र निराधार रहेको दाबी गरे।

सोही बैठकले प्रेस काउन्सिल ऐन, २०४८ संशोधन गर्न बनेको अध्यादेश जारी गर्न राष्ट्रपतिसमक्ष सिफारिस गर्ने निर्णय पनि गरेको छ।