आज र भोलि देशभरका बालबालिकालाई भिटामिन ‘ए’ र जुकाको औषधि खुवाइँदै

सरकारले आज र भोलि दुई दिन देशभरका बालबालिकालाई भिटामिन ‘ए’ क्याप्सुल र जुकाविरुद्धको औषधि खुवाउने अभियान सञ्चालन गरेको छ। मंगलबारदेखि सुरु भएको ‘राष्ट्रिय भिटामिन ‘ए’ कार्यक्रम’ बुधबारसम्म चल्नेछ।

कार्यक्रमअन्तर्गत भिटामिन ‘ए’ क्याप्सुल ६ महिनादेखि ५९ महिनासम्मका बालबालिकालाई खुवाइँदैछ। जुकाको औषधि भने एक वर्षदेखि पाँच वर्षसम्मका बालबालिकालाई खुवाइँदैछ।

यो अभियान देशभर एकैसाथ सञ्चालन गरिएको छ। अभियानमार्फत तोकिएको उमेर समूहका बालबालिकालाई दुई दिनभित्र भिटामिन ‘ए’ क्याप्सुल र जुकाको औषधि खुवाउने लक्ष्य राखिएको छ।

सम्बन्धित उमेरका बालबालिका भएका अभिभावकले यही दुई दिनभित्र उनीहरूलाई भिटामिन ‘ए’ र जुकाको औषधि खुवाउन सक्नेछन्।