सेबोनको प्रस्ताव: कारोबारयोग्य सेयरमा आधारित नयाँ बेन्चमार्क सूचकांक

नेपाल धितोपत्र बोर्डले सेयर बजारमा कारोबारयोग्य सेयरको मूल्यमा मात्र आधारित नयाँ बेन्चमार्क सूचकांक ल्याउने प्रस्ताव गरेको छ। बोर्डको कार्यपत्रमा नयाँ सूचकको नाम नेप्से बेन्चमार्क इन्डेक्स, अर्थात् एनबीआई राख्न सकिने उल्लेख छ। तर नामबारे नेप्सेले थप परामर्श गर्न सक्ने बोर्डले जनाएको छ।

हालको नेप्से परिसूचक भने नेप्से अल इक्विटी इन्डेक्सका रूपमा कायम रहने छ। अहिलेको परिसूचक सूचीकृत सबै सेयरको कुल बजार पुँजीकरणका आधारमा गणना हुन्छ। बोर्डका अनुसार संस्थापक, सरकारी र लकइनमा रहेका सेयरले पुँजीकरण बढाए पनि ती दैनिक खरिदबिक्रीमा आउँदैनन्।

प्रस्तावित विधिमा संस्थापक, सरकारी, लकइनमा रहेका र कारोबारमा नआउने सेयरलाई गणनाबाट बाहिर राखिने छ।