गगन थापा: सरकार डरले होइन भरोसाले चलोस्, रास्वपाले जिम्मेवारी लिनुपर्छ

नेपाली कांग्रेसका सभापति गगन थापाले सरकारलाई डर देखाएर होइन, जनताको भरोसा जितेर शासन चलाउन आग्रह गर्नुभएको छ। आइतबार सानेपास्थित पार्टी केन्द्रीय कार्यालयमा पदाधिकारीसँगको छलफलपछि पत्रकार सम्मेलनमा उहाँले सरकारसामु पाँच विषय राख्नुभएको छ। सञ्चारगृहमा प्रहरी पसेर पत्रकार पक्राउ गरिएको घटना उनीहरू रिहा भएसँगै नटुङ्गिने र यसमा जवाफदेहिता खोजिनुपर्ने उहाँको माग छ।

प्रहरी माथिको आदेशबिना समाचार कक्षमा नपुग्ने उहाँको दाबी छ। सत्तारूढ राष्ट्रिय स्वतन्त्र पार्टीले सरकारका राम्रा कामको श्रेय मात्र होइन, गलत कामको जिम्मेवारी पनि लिनुपर्ने सभापति थापाले बताउनुभएको छ। गलत कदमबारे रास्वपाको वक्तव्य मात्र पर्याप्त नभएको र ठोस परिणाम चाहिने उहाँको तर्क छ।

पाँच वर्षको जनादेश पाएको सरकारले कांग्रेसलाई मिलेको प्रमुख प्रतिपक्षको जनादेश पनि सम्मान गर्नुपर्ने उहाँले बताउनुभएको छ। सिँचाइ विभागका महानिर्देशक र सुनकोसी मरिन डाइभर्सन आयोजनाका प्रमुखलाई प्रहरीले नियन्त्रणमा लिई प्रधानमन्त्री कार्यालयमा बयान गराइएको भनिएको विषयमा उहाँले आपत्ति जनाउनुभएको छ। कर्मचारीको गल्तीको छानबिन स्थापित निकाय र कानुनी प्रक्रियामार्फत मात्र हुनुपर्ने उहाँको भनाइ छ।

अनुसन्धान छानीछानी गरिनु नहुने, न्यायपालिकाको स्वतन्त्रताबारे छलफल गर्न कांग्रेस तयार रहेको र शिथिल अर्थतन्त्र सुधार्न सरकारलाई सहयोग गर्न तयार रहेको पनि उहाँले जनाउनुभएको छ।