सुदूरपश्चिम–विराटनगर खेलपछि एनपीएल नियम पालनामा प्रश्न, जरिवानाबारे छलफल

नेपाल प्रिमियर लिगमा शनिबार भएको सुदूरपश्चिम रोयल्स र विराटनगर किंग्सबीचको खेलपछि प्रतियोगिताका नियम पालना र खेल सञ्चालनको निर्णय प्रक्रियामाथि प्रश्न उठेको छ। त्यसअघि दिउँसो १ बजे हुनुपर्ने लुम्बिनी लायन्स र चितवन राइनोजबीचको खेल वर्षाका कारण रद्द हुँदा दुवै टोलीले एक-एक अंक बाँडेका छन्। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा साँझ ५ बजे हुनुपर्ने दोस्रो खेल भिजेको आउटफिल्डका कारण करिब चार घण्टा ढिलो सुरु भएको थियो।

ग्राउन्ड स्टाफले मैदान तयार पारेपछि र साँझ मौसम खुलेपछि म्याच अफिसियलले पाँच ओभरको खेल गराउने निर्णय गरेका थिए। दुवै कप्तानको सहमतिमा साँझ ७ बजेर २५ मिनेटमा टस तोकिएको थियो। विराटनगरका कप्तान सन्दीप लामिछाने टसका लागि पुग्दा सुदूरपश्चिमका कप्तान दीपेन्द्रसिंह ऐरी मैदानमा आउनुभएन।

सुदूरपश्चिमले भिजेको मैदानमा खेलाडीको सुरक्षामा जोखिम हुने भन्दै सुरुमा खेल्न अस्वीकार गरेको थियो। म्याच रेफ्रीको निर्णयपछि भने टोली मैदानमा उत्रिएको थियो। एनपीएलको आठौँ खेलमा विराटनगरले सुदूरपश्चिमलाई ३५ रनले हराउँदै लगातार दुई हारपछि पहिलो जित निकालेको छ।

मैदान खेल्नयोग्य भइसकेपछि पनि नमान्ने टोलीको सट्टा विपक्षीलाई दुई अंक किन दिइएन भन्ने प्रश्न पनि उठेको छ। खेलपछि सुदूरपश्चिमले फेसबुकमा मैदान खेल्नयोग्य नभए पनि दर्शकका लागि खेलेको भन्दै व्यङ्ग्यात्मक प्रतिक्रिया दिएको छ।