भारत र भुटानबीच ऊर्जा सहकार्य विस्तार गर्ने प्रतिबद्धता

भारत र भुटानले ऊर्जा आयोजनाका लागि ४ हजार करोड भारतीय रुपैयाँको कर्जा सुविधासम्बन्धी सम्झौताको स्वागत गर्दै द्विपक्षीय ऊर्जा सहकार्य बढाउने प्रतिबद्धता जनाएका छन्। सेप्टेम्बर १६ देखि १८ सम्म भुटान भ्रमणमा रहेका भारतीय विदेशमन्त्री एस जयशङ्करसँगको भेटवार्तामा द्विपक्षीय, क्षेत्रीय र अन्तर्राष्ट्रिय विषयमा छलफल भएको छ। दुवै पक्षले १ हजार २० मेगावाट क्षमताको पुनात्साङछु–२ जलविद्युत् आयोजनाको उद्घाटनलाई प्रमुख उपलब्धि मानेका छन्।

यस्तै, १ हजार २०० मेगावाटको पुनात्साङछु–१ आयोजनाको बाँध निर्माण पनि फेरि सुरु भएको छ। भ्रमणका क्रममा ५०० किलोवाटको लुनाना जलविद्युत् आयोजना, मोङ्गरस्थित ६५ शय्याको मातृ तथा बाल अस्पताल र सामद्रुप जोङ्खर–त्राशिगाङ राजमार्गको जगन्नाथन पुल उद्घाटन गरिएको छ। दुवै पक्षले गेलेफु माइन्डफुलनेस सिटी, व्यापार–पारवहन र अन्तरिक्ष क्षेत्रमा सहकार्यबारे पनि कुराकानी गरेका छन्।

गेलेफुसम्मको आवतजावत सजिलो बनाउन भारतले असमको हातिसरमा अध्यागमन जाँच चौकी स्थापना गर्ने निर्णय गरेको छ। गेलेफु–कोक्राझार र समत्से–बनारहाट सीमापार रेलमार्गको प्रगति तथा भुटानी नागरिकले भारतमा युपीआईबाट डिजिटल भुक्तानी गर्न पाउने व्यवस्थाको पनि स्वागत गरिएको छ। भारतीय सांस्कृतिक सम्बन्ध परिषद्को छात्रवृत्ति पाउने भुटानी विद्यार्थीको सङ्ख्या ३० बाट ६० र नालन्दा विश्वविद्यालयको सिट ३० बाट ५५ पुर्‍याउने निर्णय भएको छ।

जयशङ्करले भुटानी विदेश मामिला तथा विदेश व्यापारमन्त्री डीएन धुङ्ग्याललाई पनि भारत भ्रमणको निम्तो दिनुभएको छ।