साउदी अरबलाई एफ–३५ लडाकु विमान बेच्न अमेरिकाको स्वीकृति

अमेरिकी विदेश मन्त्रालयले साउदी अरबलाई लकहिड मार्टिन कम्पनीका एफ–३५ लडाकु विमान बेच्ने प्रस्तावमा बिहीबार स्वीकृति दिएको छ। मन्त्रालयका अनुसार करिब २४ अर्ब अमेरिकी डलरको यो सम्झौतामा ४८ विमान, प्रेट एन्ड ह्विटनीका ४९ इन्जिन, सञ्चार उपकरण र पार्टपुर्जा समेटिएका छन्। सम्झौता कार्यान्वयन हुन अमेरिकी संसद् कङ्ग्रेसको अनुमोदन आवश्यक छ।

राडारबाट लुक्न सक्ने स्टिल्थ प्रविधिको एफ–३५ अमेरिकाको अत्याधुनिक लडाकु विमान हो। साउदी अरबले सन् २०२५ को सुरुमा राष्ट्रपति डोनाल्ड ट्रम्पसँग यी विमान मागेको थियो। सोही वर्षको नोभेम्बरमा युवराज मोहम्मद बिन सलमानको अमेरिका भ्रमणका क्रममा खरिदबारे सहमति भएको थियो।

वासिङ्टनस्थित साउदी दूतावासले सामाजिक सञ्जाल एक्समा यो बिक्रीलाई दुवै देशबीचको रणनीतिक साझेदारी र रक्षा सहकार्यको प्रगतिको प्रतिबिम्ब भएको जनाएको छ। अमेरिकाले मध्यपूर्वमा हतियार बेच्दा इजरायलको गुणात्मक सैन्य अग्रता जोगाउने नीति लिँदै आएको छ। हाल यस क्षेत्रमा इजरायलसँग मात्र एफ–३५ छ र उसले करिब १० वर्षदेखि यो विमान उडाउँदै आएको छ।

इजरायलले पनि यो बिक्रीप्रति चिन्ता जनाएको छ। अमेरिकी हतियारको सबैभन्दा ठूलो खरिदकर्ता साउदी अरबले इरानतर्फको खतरा सामना गर्न र वायुसेना आधुनिक बनाउन २ स्क्वाड्रनका लागि विमान खोजिरहेको छ। साउदी वायुसेनासँग हाल बोइङ एफ–१५, टोर्नाडो र टाइफुन विमान छन्।