जापानमा ब्याजदर ३१ वर्षयताकै उच्च बिन्दुमा

जापानको केन्द्रीय बैङ्कले शुक्रबार नीतिगत ब्याजदर बढाएर ३० वर्षभन्दा लामो अवधियताकै उच्च स्तरमा पुर्‍याएको छ। बैङ्क अफ जापानका अनुसार २५ आधार बिन्दुको वृद्धिपछि ब्याजदर १.२५ प्रतिशत पुगेको छ र यो निर्णय ७–२ को बहुमतले पारित भएको छ। यसअघि युरोपेली केन्द्रीय बैङ्क र अमेरिकी फेडेरल रिजर्भले पनि कडा मौद्रिक नीति अपनाएका थिए।

मध्यपूर्व सङ्कटका कारण तेलको मूल्य उकालो लागेको र येन कमजोर बनेकाले महँगी नियन्त्रणका लागि ब्याजदर थप बढाउँदै लैजाने बैङ्कले जनाएको छ। वेबसाइटमार्फत जारी विवरणमा अन्तर्निहित मुद्रास्फीति २ प्रतिशतको नजिक आइपुगेको र वित्तीय अवस्था सहज रहेको उल्लेख छ। येनको मूल्य घटबढमाथि केन्द्रीय बैङ्कका अधिकारीहरूले नजिकबाट निगरानी गरिरहेका छन्।

घोषणाअघि १ अमेरिकी डलर बराबर करिब १५६ येन पर्नेमा घोषणापछि १५७ येनभन्दा बढी पर्न थालेको छ। जापानको आन्तरिक मामिला तथा सञ्चार मन्त्रालयको तथ्याङ्कअनुसार ताजा खाद्यबाहेकको मुद्रास्फीति अगस्टमा १.८ प्रतिशतबाट ओर्लिएर १.७ प्रतिशतमा आएको छ। पेट्रोल र बिजुली महसुलमा सरकारी सहुलियतले मूल्यवृद्धिको गति सुस्त बनाएको तथ्याङ्कमा देखिएको छ।

विश्लेषक स्टेफन इन्नेसले यो वृद्धि नै चाँडो भएको भन्दै २ सदस्य असहमत हुनु महत्त्वपूर्ण रहेको बताउनुभएको छ।