डेनमार्कले उत्तरी सागरमुनि कार्बन भण्डारण सुरु गर्‍यो

डेनमार्कले उत्तरी सागरको पिँधमुनि कार्बनडाइअक्साइड भण्डारण सुरु गरेको छ। ऊर्जा कम्पनी आइएनइओएसले ग्रीन्स्यान्ड कार्बन सङ्कलन तथा भण्डारण परियोजनाअन्तर्गत निनी वेस्टको पुरानो तेल प्लेटफर्ममुनि ग्यास राख्न थालिएको जनाएको छ। यो भण्डारणस्थल डेनमार्कको पश्चिमी किनारबाट करिब २०० किलोमिटर पर छ।

आइएनइओएसका प्रमुख कार्यकारी अधिकृत डेभिड बकनलले ग्रीन्स्यान्डलाई युरोपेली सङ्घभित्रकै पहिलो पूर्ण स्तरको कार्बन भण्डारणस्थल भन्दै यसले युरोपभर यस्ता परियोजना फैलाउने आधार बनाउने बताउनुभएको छ। पहिलो चरणमा वर्षेनि ४ लाख टन कार्बनडाइअक्साइड भण्डारण गरिने र सन् २०३० सम्ममा यो क्षमता वार्षिक ४० लाखदेखि ८० लाख टन पुर्‍याउने कम्पनीको योजना छ। यो ग्यास मुख्यतः डेनमार्कका बायोमिथेन कारखानाबाट सङ्कलन गरी तरल बनाएर एस्बेर्ज बन्दरगाहबाट पानीजहाजमा पुर्‍याइने छ।

अन्तर्राष्ट्रिय ऊर्जा एजेन्सी र संयुक्त राष्ट्रसङ्घको जलवायु प्यानल आइपिसिसीले सिमेन्ट तथा स्टिल उद्योगको उत्सर्जन कटौतीमा यो प्रविधि उपयोगी हुने बताउँदै आएका छन्। यद्यपि यो प्रविधि जटिल र खर्चिलो मानिन्छ। युरोपेली सङ्घले नेट–शून्य उद्योग ऐनमार्फत सन् २०३० सम्म प्रत्येक वर्ष कम्तीमा ५ करोड टन कार्बन भण्डारण गर्न सक्ने क्षमता बनाउने लक्ष्य राखेको छ।

छिमेकी नर्वेमा शेल, इक्विनोर र टोटल इनर्जीको संयुक्त लगानीको नर्दर्न लाइट्स परियोजनाले सन् २०२५ अगस्टदेखि नै समुद्रमुनि कार्बन भण्डारण गर्दै आएको छ।