विश्व अर्थतन्त्र लचिलो तर जोखिम कायमै: आईएमएफ प्रमुख

अन्तर्राष्ट्रिय मुद्रा कोष, आईएमएफकी प्रबन्ध निर्देशक क्रिस्टालिना जर्जिएभाले विश्व अर्थतन्त्रले अपेक्षाभन्दा बढी लचकता देखाए पनि जोखिम नटरेको बताउनुभएको छ। आइतबार न्युयोर्कमा कतार इकोनोमिक फोरमको कार्यक्रमलाई सम्बोधन गर्दै उहाँले उच्च मुद्रास्फीति, ऋण भुक्तानीको बढ्दो खर्च र एआई अर्थात् कृत्रिम बौद्धिकतामा भइरहेको द्रुत लगानीलाई मुख्य जोखिमका रूपमा औँल्याउनुभएको छ। जर्जिएभाका अनुसार धेरै मुलुकमा मूल्यवृद्धि अपेक्षित गतिमा घटेको छैन, त्यसैले केही केन्द्रीय बैंकले मौद्रिक नीति अझ कसिलो बनाउनुपर्ने हुन सक्छ।

वित्तीय अनुशासन जरुरी भएको सरकारहरूले मानेका भए पनि त्यसअनुरूप कदम पर्याप्त नभएको उहाँको भनाइ छ। एआई क्षेत्रमा ऋणमा आधारित लगानी र एकआपसमा जोडिएका वित्तीय कारोबार बढेकाले अपेक्षित प्रतिफल नआए लगानीकर्ता निराश हुने र त्यसको असर समग्र वित्तीय प्रणालीमा पुग्न सक्ने उहाँले चेतावनी दिनुभएको छ। एआईसम्बन्धी वित्तीय जोखिम मुख्यतः अमेरिकामा केन्द्रित भए पनि एसिया र युरोपका धेरै देश विश्वव्यापी आपूर्ति शृङ्खलामा जोडिएकाले ठूलो उतारचढावको असर तिनमा पनि पर्न सक्ने उहाँको भनाइ छ।

ऊर्जा आपूर्ति सङ्कट, मुद्रास्फीति र महँगो ऋणजस्ता झट्काबीच पनि विश्व अर्थतन्त्रले करिब ३ प्रतिशत वृद्धि कायम राख्नु उल्लेखनीय उपलब्धि भएको जर्जिएभाले बताउनुभएको छ। ऊर्जा सङ्कटमा विभिन्न पक्षले समयमै चालेका तीव्र कदमले आफूलाई आशावादी बनाएको पनि उहाँले उल्लेख गर्नुभएको छ।