राष्ट्रसङ्घ महासभामा नेताहरूको सम्बोधन सुरु, इरान युद्ध र एआई प्रमुख एजेन्डा

संयुक्त राष्ट्रसङ्घको ८१औँ महासभामा आजदेखि विश्वका नेताहरूको सम्बोधन सुरु हुँदै छ। इरान युद्ध र कृत्रिम बौद्धिकता अर्थात् एआई यसपटकका मुख्य एजेन्डा बनेका छन्। प्रधानमन्त्री वालेन्द्र शाह महासभामा भाग लिन आजै कतार एयरवेजको विमानबाट अमेरिका प्रस्थान गर्दै हुनुहुन्छ।

महासचिव एन्टोनियो गुटेरेसले वार्षिक प्रतिवेदन प्रस्तुत गरेपछि परम्पराअनुसार ब्राजिलका राष्ट्रपति लुइज इनासियो लुला डा सिल्भा पहिलो वक्ता हुनुहुनेछ। त्यसलगत्तै अमेरिकी राष्ट्रपति डोनाल्ड ट्रम्पको सम्बोधन तय छ। बिहानको सत्रमा कतारका अमिर तमिम बिन हमाद अल थानी, टर्कीका राष्ट्रपति रेसेप तैयप एर्दोगान र फ्रान्सका राष्ट्रपति इमानुएल म्याक्रोनले पनि सम्बोधन गर्ने कार्यक्रम छ।

न्युयोर्कमा भेटवार्तापछि राष्ट्रपति म्याक्रोनले ट्रम्पसँग युक्रेन–रुस द्वन्द्व र लाल सागरको अवस्थाबारे रचनात्मक छलफल भएको बताउनुभएको छ। एआईतर्फ महासचिव गुटेरेसले अत्याधुनिक एआई मोडेललाई अन्तर्राष्ट्रिय मापदण्ड र निगरानीमा राख्ने फिनल्यान्ड र नर्वेको पहललाई स्वागत गर्नुभएको छ। फिनल्यान्डका राष्ट्रपति अलेक्जान्डर स्टब र नर्वेका प्रधानमन्त्री जोनास गार स्टोरेको नेतृत्वमा सुरु भएको पहलले एआईको मापदण्ड र प्रमाणीकरणका लागि अन्तर्राष्ट्रिय संस्था बनाउने सम्भावना खोज्न सदस्य राष्ट्रलाई आग्रह गरेको छ।

यसैबीच, राष्ट्रसङ्घअन्तर्गतको एआईसम्बन्धी वैज्ञानिक प्यानलका विज्ञहरूले एआईका जोखिमबारे अतिरञ्जित भाष्यभन्दा वैज्ञानिक प्रमाणमा आधारित बहस आवश्यक रहेको बताएका छन्।