होर्मुज खोल्न ८० देशको आह्वान, इरानद्वारा ७ दिने युद्धविराम प्रस्ताव

बहराइनको नेतृत्वमा संयुक्त राष्ट्रसङ्घका करिब ८० सदस्य राष्ट्रले होर्मुज जलमार्ग तुरुन्त र पूर्ण रूपमा खुला गर्न संयुक्त आह्वान गरेका छन्। बहराइनका विदेशमन्त्री अब्दुल लतिफ अल–जयानीले ८१औँ महासभाका क्रममा न्युयोर्कमा पत्रकार सम्मेलन गरी सहभागी मुलुकको तर्फबाट यो माग राख्नुभएको हो। उहाँले जलमार्गमा अवरोध रहँदा विश्व व्यापार, ऊर्जा सुरक्षा र अर्थतन्त्रमा गम्भीर असर पर्ने बताउनुभएको छ।

बहराइनी विदेश मन्त्रालयका अनुसार उहाँले मार्चमा पारित सुरक्षा परिषद्को प्रस्ताव २८१७ पूर्ण रूपमा लागू गर्न पनि आग्रह गर्नुभएको छ। संयुक्त वक्तव्यमा इरानबाट भएको भनिएको आक्रमण तथा लाल सागर र बाब अल–मन्दब क्षेत्रमा हुथी समूहका गतिविधिप्रति चिन्ता जनाइएको छ। यसैबीच, इरानी विदेशमन्त्री अब्बास अराघ्चीले केही सर्त पूरा भए सात दिनभित्र होर्मुज खोल्ने प्रस्ताव मध्यस्थमार्फत अमेरिकालाई पठाइएको बताउनुभएको छ।

इरानका अनुसार यो प्रस्ताव गत जुनमा अमेरिकासँग भएको समझदारीपत्रमा आधारित छ। न्युयोर्कमै अमेरिकी र इरानी वार्ताकारबीच छलफल भइरहेको छ, जसमा होर्मुज खोल्ने र इरानमाथिको आर्थिक नाकाबन्दी हटाउने विषय उठेको छ। इरानी राष्ट्रपति मसूद पेजेश्कियानले युद्ध टुङ्ग्याउने निर्णय अमेरिकाकै हातमा रहेको बताउनुभएको छ।

युद्धविराम वार्ताको सम्भावनासँगै शुक्रबार अन्तर्राष्ट्रिय बजारमा कच्चा तेलको मूल्य घटेको छ।