राष्ट्रसङ्घमा नेतन्याहुको सम्बोधनमा कूटनीतिज्ञ बाहिरिए, न्युयोर्कमा प्रदर्शन; कतारद्वारा आरोप अस्वीकार

संयुक्त राष्ट्रसङ्घको ८१औँ महासभामा इजरायली प्रधानमन्त्री बेन्जामिन नेतन्याहुले बिहीबार सम्बोधन सुरु गर्दा धेरै देशका कूटनीतिज्ञ सभाकक्षबाट बाहिरिएका छन्। कतिपय प्रतिनिधि भाषण सुरु हुनुअघि नै निस्किएका थिए भने केहीले उभिएर ताली बजाउँदै समर्थन जनाएका थिए। नेतन्याहुले बाहिरिनेलाई 'नैतिक कायर' भन्दै बाँकीलाई पनि तुरुन्तै निस्कन व्यंग्य गर्नुभएको छ।

सार्वजनिक रूपमा साथ दिने तर सभाकक्ष छाड्ने देशहरूको व्यवहारलाई उहाँले पाखण्ड भन्नुभएको छ। सम्बोधनमा उहाँले कतारले इजरायलविरुद्ध जनमत प्रभावित पार्ने अभियान चलाएको आरोप लगाउनुभएको थियो। कतारी विदेश मन्त्रालयका प्रवक्ता माजेद अल–अन्सारीले ती आरोप निराधार रहेको र प्यालेस्टिनी भूभागमा इजरायलका कारबाहीबाट ध्यान मोड्ने प्रयास भएको बताउनुभएको छ।

उहाँका अनुसार विश्वभर, विशेषगरी युवामा आएको धारणा परिवर्तन मानिसले प्यालेस्टिनी क्षेत्रको अवस्था आफैँ देखेर आएको हो। यता, न्युयोर्कमा नेतन्याहुको भ्रमणविरुद्ध प्रदर्शन भएको छ। प्रदर्शनकारीले गाजा युद्धको जवाफदेहिता माग्दै इजरायललाई दिइने अमेरिकी सैन्य सहयोग रोक्न माग गरेका छन्।

प्रदर्शनका क्रममा प्रहरीले निर्वाचित जनप्रतिनिधिसहित करिब सय जनालाई पक्राउ गरेको थियो।