सम्पर्कविहीन हुम्लाका १० जडीबुटी सङ्कलक सकुशल सम्पर्कमा

हिमाली क्षेत्रमा जडीबुटी सङ्कलन गर्न गएर एक सातादेखि सम्पर्कविहीन रहेका हुम्लाका १० जना सकुशल सम्पर्कमा आएका छन्। जिल्ला प्रहरी कार्यालय हुम्लाका प्रहरी नायब उपरीक्षक शङ्कर खड्काका अनुसार सोमबार सबै जनासँग सम्पर्क भएको हो। उनीहरू सिमकोट गाउँपालिका–२ ठेहेगाउँका बासिन्दा हुन्।

उनीहरू कटुको सङ्कलन गर्न भदौ २८ गते खार्पुनाथ गाउँपालिका–५ र चङ्खेली गाउँपालिका–४ को सिमानामा पर्ने लुर्पेखोला जङ्गलतर्फ गएका थिए। असोज ८ गतेदेखि परिवारसँग कुनै सम्पर्क हुन नसकेपछि आफन्तले जिल्ला प्रशासनलाई खबर गरेका थिए। त्यसपछि प्रशासनले खोजी सुरु गरेको थियो।

दुर्गम हिमाली भूभाग र सञ्चार सुविधाको अभावले उनीहरू केही दिन परिवारसँग जोडिन नसकेको प्रहरीले जनाएको छ। जल तथा मौसम विज्ञान विभागका अनुसार आज हिमाली र पहाडी भूभागमा आंशिक बादल लाग्नेछ। हिमाली र पहाडी क्षेत्रका एक–दुई स्थानमा हल्का वर्षा वा हिमपात हुन सक्ने विभागको पूर्वानुमान छ।

कर्णाली प्रदेशको राजधानी वीरेन्द्रनगरमा आंशिक बादल लाग्ने र वर्षाको सम्भावना नरहेको विभागले जनाएको छ। भोलि भने तराईसहित देशभर आंशिक बादल लाग्ने विभागको अनुमान छ।