दुई महिनामा ११ अर्बभन्दा बढी वैदेशिक लगानी प्रतिबद्धता

चालु आर्थिक वर्ष २०८३/८४ को पहिलो दुई महिनामा नेपालमा ११ अर्ब रुपैयाँभन्दा बढी प्रत्यक्ष वैदेशिक लगानी प्रतिबद्धता आएको छ। उद्योग विभागका अनुसार साउन र भदौमा गरी ३२८ परियोजनामार्फत करिब ११ अर्ब १२ करोड रुपैयाँ बराबरको प्रतिबद्धता प्राप्त भएको हो। विदेशी लगानीकर्ताको मुख्य आकर्षण पर्यटन र सेवा क्षेत्रमा देखिएको छ।

दुई महिनाको कुल प्रतिबद्धतामध्ये पर्यटन क्षेत्रमा सबैभन्दा बढी करिब ३ अर्ब ७४ करोड रुपैयाँ लगानी प्रस्ताव भएको विभागको तथ्याङ्क छ। सेवामूलक क्षेत्रमा २६ परियोजनामार्फत करिब ३ अर्ब ३० करोड रुपैयाँ प्रतिबद्धता आएको छ, जुन कुल प्रतिबद्ध लगानीको करिब २९ प्रतिशत हो। भदौ महिनामा मात्रै १३६ परियोजनामार्फत करिब ६ अर्ब ३५ करोड रुपैयाँ प्रत्यक्ष वैदेशिक लगानी प्रतिबद्धता आएको विभागले जनाएको छ।

यसमध्ये स्वचालित प्रणालीमार्फत १३५ परियोजनाका लागि करिब ६ अर्ब २७ करोड रुपैयाँ र साधारण प्रक्रियामार्फत एउटा परियोजनाका लागि ८० करोड रुपैयाँ प्रतिबद्धता आएको छ।