प्रतिकूल मौसमका कारण जनमत पार्टीको महाधिवेशन असोज १७ मा सर्‍यो

जनमत पार्टीको दोस्रो महाधिवेशन प्रतिकूल मौसमका कारण सारेर असोज १७ गते शनिबार वीरगञ्जमा गर्ने तय भएको छ। यसअघि महाधिवेशन असोज ९ र १० गते वीरगञ्जको टाउनहलमा आयोजना गर्ने कार्यक्रम थियो। केही दिनदेखि निरन्तर परिरहेको वर्षा र आगामी दिनमा भारीदेखि अति भारी वर्षाको पूर्वानुमानलाई ध्यानमा राखेर मिति परिवर्तन गरिएको पार्टी प्रवक्ता चन्दन सिंहले जानकारी दिनुभएको छ।

खराब मौसमले देशका विभिन्न भागबाट आउने प्रतिनिधि, नेता र शुभचिन्तकको यात्रा तथा व्यवस्थापनमा समस्या पर्न सक्ने देखिएकाले तालिका फेरिएको उहाँको भनाइ छ। पार्टीको विज्ञप्तिमा तयारी पूरा भइसकेको भए पनि सहभागीको सुरक्षा र सहज आवतजावतलाई प्राथमिकता दिइएको उल्लेख छ। पुरानो कार्यतालिकाअनुसार अध्यक्षसहित विभिन्न केन्द्रीय पदका लागि उम्मेदवारी दर्ताको प्रक्रिया सुरु भइसकेको थियो।

परिमार्जित कार्यतालिकाअनुसार अब महाधिवेशन असोज १७ गते हुने पार्टीले जनाएको छ। जल तथा मौसम विज्ञान विभागका अनुसार आज बागमती, गण्डकी, लुम्बिनी, कर्णाली र सुदूरपश्चिमका थोरै स्थानमा भारीदेखि धेरै भारी वर्षा हुन सक्छ। लुम्बिनी र सुदूरपश्चिमका एक–दुई स्थानमा अति भारी वर्षाको सम्भावना छ।

मधेश प्रदेश र बागमती, गण्डकी तथा लुम्बिनीका तराईका केही स्थानमा हावाहुरीको पनि सम्भावना छ। काठमाडौँ, विराटनगर र जनकपुरमा वर्षाको सम्भावना ६० प्रतिशत रहेको विभागले जनाएको छ। विभागका अनुसार भारतको उत्तर महाराष्ट्र र छत्तिसगढ आसपास रहेको बलियो न्यून चापीय प्रणाली आगामी २४ घण्टामा क्रमशः कमजोर हुने सम्भावना छ।