सहमति नभए प्रतिस्पर्धाबाट नेतृत्व चयन गर्नुपर्छ: अर्जुननरसिंह केसी

नेपाली कांग्रेसका नेता तथा प्रतिनिधिसभा सदस्य अर्जुननरसिंह केसीले महाधिवेशनमा पूर्ण सहमति नजुटे निष्पक्ष प्रतिस्पर्धाबाट नेतृत्व छान्नुपर्ने बताउनुभएको छ। असोज १६ गतेदेखि सुरु हुने महाधिवेशनलाई लक्षित गर्दै सार्वजनिक गरेको धारणामा उहाँले पार्टी एकता, सौहार्द र सर्वसम्मतिका लागि आफूले लगातार प्रयास गरिरहेको उल्लेख गर्नुभएको छ। शतप्रतिशत सहमति र एकताको सम्भावना नदेखिए स्वस्थ र निष्पक्ष लोकतान्त्रिक प्रतिस्पर्धालाई खुसीसाथ स्वीकार्नुपर्ने उहाँको भनाइ छ।

महाधिवेशन नियमित सांगठनिक प्रक्रिया मात्र नभई पार्टी, लोकतन्त्र र राष्ट्रको भविष्यका लागि महत्त्वपूर्ण अवसर भएको उहाँले बताउनुभएको छ। केसीले कांग्रेसलाई नेपाली इतिहासका विभिन्न मोडमा नवीनता र निरन्तरता जोड्ने लोकतान्त्रिक अभियानका रूपमा व्याख्या गर्नुभएको छ। अग्रज पुस्ताको अनुभव, त्याग र मार्गदर्शनलाई नयाँ पुस्ताको ऊर्जा, साहस र नवप्रवर्तनसँग जोड्नुपर्ने धारणा पनि उहाँले राख्नुभएको छ।

बदलिँदो सामाजिक र राजनीतिक परिवेश तथा अहिलेका चुनौतीलाई गम्भीर रूपमा बुझ्नु मुख्य आवश्यकता रहेको उहाँको तर्क छ। व्यक्तिगत सीमा, आग्रह–पूर्वाग्रह र मतभेदभन्दा माथि उठेर पार्टीको बृहत् हितमा ध्यान दिन केसीले आग्रह गर्नुभएको छ। महाधिवेशनले पार्टीलाई नयाँ दिशा दिनुपर्नेमा पनि उहाँले जोड दिनुभएको छ।