ऊर्जा आयोजनामा अवरोध गर्ने आफ्नै कार्यकर्तामाथि कारबाही गर्ने गगन थापाको प्रतिबद्धता

नेपाली कांग्रेसका सभापति गगन थापाले जलविद्युत् तथा ऊर्जा आयोजनाको निर्माणमा बाधा पुर्‍याउने आफ्नै पार्टीका नेता–कार्यकर्तालाई कारबाही गर्ने प्रतिबद्धता व्यक्त गर्नुभएको छ। स्वतन्त्र ऊर्जा उत्पादकहरूको संस्था, नेपाल अर्थात् इप्पानले बिहीबार राजनीतिक दलसँग गरेको संवादमा उहाँले यस्तो बताउनुभएको हो। कांग्रेसनिकट स्थानीय सरकार वा कार्यकर्ताले कानुनबमोजिम काम गरिरहेका उद्यमीलाई दुःख दिए पार्टीको संस्थागत संयन्त्रमा उजुरी दिन सकिने र दोषी ठहरिए कारबाही अघि बढ्ने थापाले बताउनुभएको छ।

यस्तो गुनासो पार्टीसम्म ल्याइए समस्या सहज बनाउनु आफ्नो जिम्मेवारी हुने उहाँको भनाइ छ। पार्टीसँग आबद्ध जनप्रतिनिधिले निजी क्षेत्रलाई बेकारमा दुःख दिने अवस्था स्वीकार्य नहुने पनि उहाँले बताउनुभएको छ। राजनीतिक पहुँचको आडमा आयोजनामाथि दबाब दिने प्रवृत्ति अन्त्य हुनुपर्नेमा उहाँले जोड दिनुभएको छ।

इप्पानका पदाधिकारीले पछिल्लो समय स्थानीय तह र दलका कार्यकर्ताबाट आयोजना निर्माणमा हुने अवरोध गम्भीर बन्दै गएको गुनासो गरेका थिए। सो गुनासोपछि थापाले कांग्रेसभित्र स्थानीय सरकारलाई प्रशिक्षण र सशक्तीकरण गर्ने विषय पनि उठाउनुभएको छ।