दुई महिनामा सेयर कारोबार ५३ प्रतिशतले घट्यो, लाभकर आम्दानी पनि ओरालो

चालु आर्थिक वर्ष २०८३/८४ को पहिलो दुई महिनामा सेयर कारोबार रकम आधाभन्दा बढीले घटेको छ। साउन र भदौमा गरी नेपाली सेयर बजारमा १ खर्ब ८१ अर्ब ४५ करोड रुपैयाँ बराबरको किनबेच भएको छ। यो रकम अघिल्लो आर्थिक वर्षको सोही अवधिको तुलनामा ५३ दशमलव ०८ प्रतिशत कम हो।

गत वर्ष साउन र भदौमा ३ खर्ब ८६ अर्ब ७२ लाख रुपैयाँको सेयर कारोबार भएको थियो। यस अवधिमा जलविद्युत् समूहको सबैभन्दा बढी ८६ अर्ब रुपैयाँ बराबरको सेयर किनबेच भएको छ, जुन गत वर्षको तुलनामा ३८ दशमलव ५४ प्रतिशत कम हो। ऋणपत्रबाहेक अन्य सबै समूहको कारोबार घटेको छ भने दुई महिनामा २ अर्ब ५१ करोड रुपैयाँको ऋणपत्र कारोबार भएको छ, जुन गत वर्षको तुलनामा उल्लेख्य बढी हो।

कारोबार घट्दा सरकारको आम्दानीमा पनि गिरावट आएको छ। सीडीएससीका अनुसार दुई महिनामा पुँजीगत लाभकरबाट १ अर्ब २५ करोड ७६ लाख रुपैयाँ संकलन भएको छ, जुन गत वर्षको तुलनामा ५४ दशमलव ४२ प्रतिशत कम हो। भदौमा मात्र ६३ करोड २७ लाख रुपैयाँ लाभकर उठेको छ, जुन गत वर्षको भदौको तुलनामा ५ दशमलव २० प्रतिशत बढी हो।

सरकारले चालु आर्थिक वर्षको बजेटमार्फत पुँजीगत लाभकर दर बढाए पनि बजार ओरालो लाग्दा आम्दानी घटेको हो।