बाढीपहिरोले विद्यालय क्षति, बागलुङका १,२९७ बालबालिकाको पढाइ प्रभावित

असोज ८ देखि ११ गतेसम्मको अविरल वर्षापछि आएको बाढीपहिरोले विद्यालयमा क्षति पुर्‍याउँदा बागलुङका चार स्थानीय तहका १ हजार २९७ बालबालिकाको पढाइ प्रभावित भएको छ। निसीखोला गाउँपालिकामा बाढी र बडिगाड, तमानखोला तथा ताराखोला गाउँपालिकामा पहिरोले विद्यालयलाई असर गरेको हो। ताराखोलाका सहायक शिक्षा अधिकृत युवराज शर्माका अनुसार सबैभन्दा बढी त्यहाँका पाँच विद्यालयका ८४५ विद्यार्थी प्रभावित छन्।

पहिरोले वडा नम्बर ५ का तीन र वडा नम्बर ४ का दुई विद्यालयको भौतिक संरचना ध्वस्त बनाएको छ। ताराखोला–५ को दुर्गाभवानी माध्यमिक विद्यालयको विज्ञान प्रयोगशाला पहिरोले पूरै पुरेको छ। केही विद्यालयले वैकल्पिक ठाउँ खोजेर कक्षा चलाउन थालेका छन्, तर कतिपय विद्यार्थी अझै विद्यालय जान सक्ने अवस्थामा छैनन्।

बाढीपहिरोले विद्यार्थीका घर, शैक्षिक सामग्री र विद्यालय जाने बाटोमा पनि क्षति पुर्‍याएको छ। कतिपय बालबालिकामा खोला फेरि बढ्ने र पहिरो खस्ने डर कायमै छ।